Ramri chinfelnaah document tan chhan tur kan nei tha tawk – Home minister

On Apr 17, 2025 11 0

Ramri chinfelnaah document
tan chhan tur kan nei tha tawk
– Home minister
Mizoram – Assam ramri chungchanga inbiak leh turah tan chhan tur an nei tha tawk a, palai turte pawh an inpuahchah tha hle in an hria tih Home minister K Sapdanga chuan a sawi.
April 25-a Guwahati, Assam-a Mizoram – Assam State secretary-level thutkhawm neih tur thlirhoin Nilaini khan Mizoram State Boundary Committee chu a tum 7-na atan an chairman, Home minister ho hian an thukhawm a. Chief secretary charge la mektu H Lalengmawia’n thuhma a sawi a. Boundary Committee member secretary, Home secretary Vanlalmawia leh Study Group on Assam- Mizoram Boundary convener Dr Joseph K Lalfakzuala ten report an pe.
Mizoram -Assam State secretary-level thutkhawmah hian Mizoram sawrkar chuan Home secretary Vanlalmawia hoin palai 7 a tir dawn a. Tun thutkhawmah hian an thuken tur leh pawimawh dang sawiho a ni.
Home minister chuan ramri him tak, thlamuang taka mipui an khawsak theihna tur nawr chhuah chu an thupui ber a ni tih a sawi a. Mizoram tan channa awm lo tura theihtawp chhuah a ni tih a sawi.
Mizoram -Assam ramri zirchiang tur member pali awmna Study Group chu 2024 January 25 khan din a ni, tiin, “Study Group hmalakna azarah document tanchhan tur kan nei tha tawk hle in kan inhria a. Ramri chungchang inbiaknaa palai turte pawh an inpuahchah tha thawkhatin kan hria,” a ti. Mizoram tan theihtawp chhuah turin a fuih nghal bawk.
Boundary Committee thutkhawm hmasa ber hi 2021 July 30 khan neih a ni a, kum 2021 hian tum hnih dang thu zuiin, kum 2022 leh 2023 ah tum khat ve ve, 2024 January 25-ah a tum 6-na neiin, tun hi a tum 7-na a ni.
Thutkhawmah hian an hming tarlan tawh ho bakah Revenue minister B Lalchhanzova, adviser to chief minister (Political) Lalmuanpuia Punte, Study Group on Assam-Mizoram Boundary member – ZPM, MPCC, AAP, BJP, MZP, MSU, CYMA, JAC on ILRFD aiawhte telin, ramri chungchanga mithiam sawm bik leh Home department official-te an tel.