Ramri hung duhlohna lantir Sawrkarin a thu kengkawh se – ZORO & MZP

Ramri hung duhlohna lantir
Sawrkarin a thu kengkawh se
– ZORO & MZP
India sawrkarin Indo-Myanmar ramri hung a tum an duh lohna chu Zirtawpni khan Mizo Zirlai Pawl leh Zo Reunification Organisation chuan Aizawlah an lantir a. Mizoram sawrkar chu a official resolution siam – ramri hung duh lohna chu kengkawh zel turin an ngen.
Punkhawmah hian MZP president Dr C Lalremruata chuan, India sawrkarin an ram buaina avanga Myanmar atanga rawn lutte chhuanlam a, Mizoram ram tha lai zawng zawngah ramri hung a tum chu an hrethiam thei lo tih a sawi.
“Ramri hi mihring siam chawp mai a ni. Pathianin Zofate ram leh hnam min din sak a, rorelna pakhat hnuaia awm kan duh mek lai a, Zofate chenna ram insi reng, thendarha daidanna bang siam tur hi kan pawm thei lo. India sawrkar pawhin kan duhna hriain an hmalakna thulh turin kan ngen a ni,” a ti.
ZoRO president R Sangkawia chuan, United Nation Declaration on the Rights of Indigenous People’s-in, hnam khat unau zalen taka inkalpawh a remtih lai a, thendarh tuma hmalakna chu pawm harsa an ti tih a sawi.
“Ramri hung hi, rilru leh taksaa unau inthen hlenna tur a nih avangin kan duh lo a. Ramri hung hian ruihhloa kan harsatna a sutkian a rinawm loh a, buaina kan tawh tur nen a man lo hle ang,” a ti.
Mizoram state sawrkarin, 2024 February 28 khan ramri hung duh lohna official resolution a siam a. Hei hi tun thlengin thiah a la ni loa, kengkawh zel turin sawrkar an ngen a, ZORO leh MZP chuan an thlawp tlat dawn tih a sawi bawk.
Zirtawpni vek khan India Prime minister Narendra Modi hnenah ramri hung ngaihtuah nawn tura ngenna lehkha Mizoram larsap kaltlangin an thehlut a. A copy hi Union Home minister an pe tel.