Raquel Welch a thi

Lemchan khawvela hming dai tawh lo tur Raquel Welch, kum 82, chuan mual a liam a, Hollywood-in arsi duhawm a chân leh ta. Welch hi February ni 15 tuk khan Los Angeles-a a chenna inah a thi.
Raquel Welch hi film leh television bakah stage lamah pawh hming chher tak a ni a, an rama February ni 15 tukah a thi a, a thih chhan hi puan a la ni lo. Raquel Welch hi a lemchan career, kum 50 chuang mah chhungin film 30 chuangah changin, television series 50 velah a inlan bawk a ni.
Chicago-ah September 1940-ah a piang a, 1960s-ah Fantastic Voyage leh One Million Years B.C.-ah te changin khawvelin a hmelhriat ta a ni. Heta tang hian a lemchan thiamna leh a duhawmna te chuan khawvel a hrut chhuak a, Empire magazine chuan 100 Sexiest Stars in Film History-ah an telh a, Playboy-in 100 Sexiest Stars of the 20th century in the 90s list an tihchhuahah No.3 a ni bawk.
A hmangaihna kawng zawh erawh a bumboh ve viau a, pasal pali a nei hman. James Welch nen 1959-ah inneiin, 1964-ah an inthen a, fapa Damon, kum 60, leh fanu Tahnee, kum 61 an nei a, Patrick Curtis (1967-1972), Andre Weinfeld (1980-1990) leh Richard Palmer (1999-2004) te nen an innei tawh bawk.
Raquel Welch hian The Three Musketeers film avangin Golden Globe a dawng a, 1987-a a channa ‘Right to Die’ avangin Golden Globe nomination a nei tawh bawk. 1996 khan a pualin Hollywood Walk of Fame-ah arsi dah sak a ni tawh bawk. Welch hian a chanchin a ziahna ‘Raquel: Beyond the Cleavage’ a tichhuak tawh bawk a, he lehkhabuah hian a naupan lai atanga Hollywood-a nuthlawi nih chungchang thlengin a tarlang a ni.