Ration card hman dan tharin Mizona chawhthawh phah ring

Ration card hman dan tura sawrkarin ruahmanna a siam thar chuan Mizona thinlung chawk thoin felfai zawka kal theih phah a inring tih Supply minister B Lalchhanzova chuan a sawi.
Food, Civil Supplies & Consumer Affairs department buatsaihin Thawhtanni khan ration supply chhawrtu, Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan (grievance redressal) chungchang inhrilh a ni a, retailer bakah local council leh a kaihhnawih pawl ho tana tih a ni.
Hmanpuitu FCS&CA minister B Lalchhanzova chuan retailer-te chu sawrkarin an tanghma a ngai em em tih hria a, mipui tan thahnemngai lehzual turin a fuih a. Sawrkarin TPDS chungchanga hma a lakna sawizauin, ration card var hmangte tana buhfai kg-ah Rs.30 ni tawh tur chuan Mizona thinlung chawk thoin, rualkhai leh felfai zawka an kal phah ngei a ring tih a sawi. TPDS beneficiary-te thliarfel dan tur pawh sawrkarin a ngaihtuah mek tih a sawi bawk.
FCS&CA secretary Zodingpuii chuan program neih chhan a sawifiah a. FCS&CA director Saizikpuii chuan TPDS nih phung tlangpui a sawifiah. Deputy director (G) Victor Lalawmpuia’n One Nation One Ration Card leh Grievance Redressal chungchang a sawi.
TPDS hnuaia beneficiary-te chanvo leh an harsatna chhawk zangkhai dan kawnga inhrilhhriat a ni a. Panel member insiamin sawi zau zui a ni.