Manipur-a Zohnahthlakte chunga rawng taka chetna chu tihtawp a nih thuai theihna’n rang taka hma la turin Mizoram chief minister Zoramthanga an ngen tih Congress party chuan an sawi.
MPCC thuchhuak chuan, Manipur buaina in thla hnih chuang a awh hnuah pawh India sawrkarin a ngaihsak loh zia te, Prime minister phei chuan Manipur hi a tlawh lo mai niloin, tun thlenga a la ngawihsan thu te sawiin, hetiang a nih mek lai hian July 2 (Pathianni), Kristiante ni serhah Manipur Langza khuaah Meitei ho lutin chenna in bakah Pathian biak in nen lam an hal a. Kan unaute chhanhim tuma beitu David Thiek chu Meitei hoin rawng taka thatin a lu tan sakin khaw daiah rapthlak taka an tar thu media lamah tarlan a ni tih a sawi.
Manipura Zohnahthlakte an rum takmeuh laiin Mizoram chief minister Pu Zoramthanga chuan hma lak ngaihna hre loin kan unaute himna leh dam khawchhuahna lam pawh ngaihtuah loin campaign buaiin a buai niin MPCC hian a sawi a. Amah pawh be duh lo tu, Manipur chief minister Biren Singh-a’n Zohnahthlakte chunga rawng taka a chet hnuah phone hmanga bia in chu chu a hmalakna neihchhun a ni tih sawiin, ‘Pu Zoramthanga chief minister-na hnuaiah hian Mizoram leh Zohnahthlakte dinhmun a him lo takzetah Congress party chuan a ngai a ni,’ a ti.
Manipura Zofate chunga rawng taka chetna titawp tura hmalakna kalpui thuai turin Congress party chuan MNF sawrkar a ngen tih a sawi a. ‘Kan unaute dinhmun hima an awm hma loh chuan BJP an thawhpuina pawh a ranglama chhuchat nghal turin kan ngen a. MNF party nge a dah pawimawh Mizoram mipui leh Manipura Zohnahthlakte himna tih thlang fel thuai turin kan phut a ni,’ thuchhuah chuan a ti.
Congress party chuan central hotute leh state-a Congress hruaitute nen inberawn zelin Zohnahthlakte sahimna tur hian chak zawk leh nasa zawkin hma a la zel dawn tih MPCC hian a sawi a ni.
Rawng taka chetna tihtawp tuma hma la thuai turin CM kan ngen – MPCC
Get real time updates directly on you device, subscribe now.
Prev Post