Real-in Copa Del Rey semi lut ve leh

On Jan 28, 2023 22 0

Ningani zan Copa Del Rey quarter-final inkhelah siphur hmasa chunga an mikhual Atletico de Madrid hnehletin Real Madrid-in Copa Del Rey semi-final lut hmasa Barcelona, Osasuna leh Athletic Bilbao an zawm thei hram.
World Cup break avanga Estadio Santiago Bernabeu an khar reng hnuah ni 77 chhunga a vawikhatna atan Spanish giants-in an khelmual hman thiamah mikhual an thleng leh ta chiah a; vur tla sung sung khawpa khawvawt hnuaiah khelmuala thutna awm thei zawng zawng mipuiin an luah khat a; chuti khawpa supporter nei tha chung chuan Real-in beisei angin bul an tan fuh lo a, si an phur hmasa.

Atletico captain Koke through ball pui tak umtu full back Nahuel Molina chuan Real tlarhnung thiatin Alvaro Morata a siamsak a, minute 19-ah Real academy player hlui Morata hian mikhual hmahruaina goal a tilut.
Eder Militao chuan darkar chanve khelh pelh hlekah an siphurh sut theihna golden chance hmu mah se Toni Kroos-a ball vawrhluh tha zet chu a hlawhtlinpui zo lo.

First half tawp dawn lamah inhliam Ferland Mendy hmun-ruak luahin Dani Ceballos chuan bench a thawhsan a, heta tang hian mualneitu team game a kang tan chiah.

Real hi rawn khel tha chho bawk mah se an thiampuipa Karim Benzema chuan tum hnih ngawt a hun tha neih a bawhpelh a; Federico Valverde pawhin box pawn chiah atangin goal pawnah a thawnchhuak ve bawk.
Minute 79-ah substitute Rodrygo chuan mikhual lam defender pathum bumin home team siphurh a sut hram a, mahse, hei bak hi hun pangngai tawp thlengin Spanish giants-in an khungbelh zo ta chuang lo.

Extra time tir lam minute 99-ah referee Cesar Soto Grado chuan Eduardo Camavinga a tihluk avangin a hmaa yellow card hmu tawh Atletico Madrid de-fender Stefan Savic a hnawt-chhuak a, extra time hun tam zawk chu Atleti hian player 10-in an khel a, hei hi an chakloh chhanah a puh theih awm e.

Real substitute Marco Asen-sio chuan box chhungah hniam takin cross ball a siam a, Vinicius Junior-a shot an lo khakper chu Benzema buaipui tawk chiahin a kal a, hun khirhkhanah Bernabeu club chhanchhuak thintu French striker hian mualneitu team hmahruaina goal a thawh leh ta nge nge a; hun tawp dawnah Brazilian Vinicius hian individual goal pui tak hmangin chiang zawka Real Madrid semi-final luhna goal a thawh zui ve leh.