Real Madrid an chak ve ta

Pathianni zan khan Fifa Club World Cup 2025 khelh chhunzawm a ni a, European club lian Real Madrid chuan a vawi khat nan hnehna an chang. Real Madrid rual hian Manchester City leh Juventus ten hnehna an chang ve bawk.
An khelh hmasak berah Saudi Arabia club Al-Hilal nena inhnehtawk ringawt Real Madrid hian Pathianni zan khan RB Salzburg laka tlawm tawh Pachuca an hmachhawn. Inkhel tan atanga minute 7-na lekah Raúl Asencio hnawhchhuah ni bawk mah se La Liga club lian Real Madrid hian hnehna an chang zui ta tho va, a vawi khat nan point thum an hmu.
Inkhel tan atanga minute 7-na lekah kim lo zawk ni bawk mah se Real Madrid an buai mai lova, chawlhlawk hmain goal hnih an thun hman. England midfielder Jude Bellingham chuan minute 35-naah hmahruaina goal a thun. Goal thun hmasa zawk an nih vangin an phur a, goal pawh an thun belh leh thuai. Bellingham goal thun hnu hian Arda Güler chuan minute 43-naah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah pawh Real Madrid an khel tha chhunzawm a, Federico Valverde chuan minute 70-naah an goal thumna thunin, an hmahruaina a tizau. Si thum faia an hnufual hnuin Mexican club Pachuca tan Elías Montiel chuan goal thunin an si phurh a sut then. An si phurh sut zawh tum viau mah se hun tawp thlengin goal an thun belh thei tawh lova, Real Madrid lakah tlawmin, last 16 an lut zo lovin an tla chiang nghal.
Group H-a inkhel dangah RB Salzburg leh Al Hilal te goal awm lovin an inhnehtawk ve thung. Group H-ah hian Real Madrid leh RB Salzburg ten point 4 an hmu dawn mek a, Al-Hilal in point hnih hmuin last 16 luh theihna hun tha an la nei a. Point la hmu lo Pachuca an tla chiang tawh thung. Tlawm la nei lo Al-Hilal hian tla chiang tawh Pachuca an hmachhawn zui leh dawn a, Real Madrid leh RB Salzburg an inhmachhawn zui ve leh dawn thung. Real Madrid leh Salzburg te te inkhela chak zawk zawk hi group champion niin an tlang ang a. An inhnehtawk a nih chuan an pahnihin an tlang ang a, chak lo zawk zawk an tla thei dinhmunah an ding thung.
City an chak awlsam
Pathianni zana inkhel dangah English club lian Manchester City chuan 6-0 ngawtin Al Ain an sawp a, last 16 an lut chiang nghal. City tan hian Ilkay Gündogan chuan goal hnih a thun a, Claudio Echeverri, Erling Haaland, Oscar Bobb leh Rayan Cherki ten goal khat theuh an thun. Group G a inkhel dangah Juventus chuan 4-1 in Wydad AC an hneh a, last 16 an inhlangkai ve bawk. Group G-ah hian Juventus leh Manchester City ten khelh hnih atanga point 6 ve ve hmuin last 16 an lut chiang tawh a, point la hmu lo Al Ain leh Wydad AC te an tla chiang tawh thung.
Fifa Club World Cup 2025 khelh mekah hian Botafogo, Bayern Munich, Juventus leh Manchester City ten last 16 an lut chiang tawh a, Flamengo pawh tluk tluk an ni tawh bawk.