Reiek-in Tourism Village thaa thlan an nih an lawm

Reiek khua in ‘Best Tourism Village of India 2023’ an dawn chu Inrinni khan khawtlang huapin lawm a ni a. He hun hmanpuitu Tourism minister Robert Romawia Royte chuan NESIDS (North East Special Infrastructure Development Schemes) leh PRASAD (Pilgrimage Rejuvenation And Spiritual Augmentation Drive) hnuaia project kalpui tur lungphum a phum nghal.
Minister chuan ram pum huapa ‘Best Tourism Village’ dawng theia phochhuaktu Tourism department hmalakna fakawm a tih thu a sawi a. He lawmman avangin hian Reiek chuan khualzin tlawhtu leh ngaihventu a ngah phah dawn avangin khawtlang mipui tan la zel turin a chah. Khawvel pum huap ‘Best Tourism Village’ inelna buatsaih mekah Reiek chu ‘candidate village’ a nih thu leh beiseina sang tak nen an thlir mek thu a sawi bawk.
Tourism joint secretary V Lalengmawia sawi danin, NESIDS & PRASAD hnuaiah hian Khuangchera Puk chhehvel cheibawlna tur leh Reiek Tlanga PFC (Pilgrim Facilitation Centre) dinna tur cheng nuai 361.27 senga Ministry of Tourism hnuaiah thawh a ni dawn a. June 2025-a thawh zawh tura ruahman niin, Excell Consultancy Services, Mission Veng Aizawlin a thawk dawn a ni.
Development of Infrastructure for Tourism at Reiek and Reiek Tlang, cheng Nuai 560 hmanga NESIDS DoNER ministry hnuaia component hrang hrang, DJ Consultation Services Chaltlang Aizawlin July 2020 atanga a thawh tawh chu Tourism minister hian Inrinni vek khan a hawng a ni.