Reiek kai Tlawng lei hawng

Reiek kai Tlawng lei hawng
Reiek kawnga Tlawng lei chu mipui hman theihin Zirtawpni khan PWD engineer -in- chief Lalrinkima Hnamte chuan a hawng.
He lei hi metre 55-a thui, metre 12.2 (feet 40.6) a zau a ni a. Lirtheiin a zawh tur chin hi metre 7.5 a zau a ni a, a sir ve ve ah kea kalna tur metre 1.2 a zau siam a ni a, lei san zawng hi metre 7 a ni.
Tlawng lei dawhna tur hian Central Road Fund kaltlangin Ministry of Road Transport & Highways-in cheng nuai 757.56 a ruahman a, 2017 February 28-ah hna tan a ni a. Thla 24 chhunga thawh zawh tura tih a nih laiin, 2017 June 12-a nasa taka ruah a sur vangin Tlawng lui kuang chim san ber anga chhinchhiah thin chu metre 5.05-in a chim pel a, hei vang hian lei hi a tira ruahman aia tih san a nih loh chuan hun lokal zel turah a him dawn loa hriat a ni a, a design leh specification thlakin a tira ruahman aia thuiin siamthat a ni.
Lei dawh hna thawk tur hian M/s Satguru Engineers & Allied Services Pvt. Ltd. Guwahati thlan a ni a, ton 70-a rit dawl thei tura duan a ni a. PWD hotute chuan lei hi a tlo zawkna’n lei chungah lirthei din phal a ni lo tih an sawi a ni.
Hma lak a nih tan tirhah fur ruahtui tam vangin ngaihtuahna thar senga lei dawh hi ruahman that a ngai a, a hnuah Covid leng vangin hnathawh a sawt thei loa, tum hunah an zo thei ta lo tih Er Lalrinkima hian a sawi a ni.