Rel kawng siamna hmanrua rukbo thin kan bawhzui tha – Mizoram Police

Sairang thlen rel kawng siam mekah an hmanrua rukbo a awmin an bawhzui tha a, pawikhawihna a thlen loh nan theih ang angin an vilpui reng tih Mizoram Police chuan an sawi.
Tunhnaiah NF Railways hotuten chief minister an hmuh tumin, an bungrua rukbo a tam thu leh lirthei hial hmanga rukbo te pawh a awm nia an hriat thu an thlen a. Heng thilah hian police-ten hma an la tawk lo anga ngaih theih tur an sawi tel chu thu belhchian dawllo a ni tih Mizoram Police thuchhuah chuan sawiin, rel kawng siam mekah hian pawikhawihna a thlenin police-ten theihtawpin chhuichhuah hna an thawk thin a, thubuai tam zawkah bungraw rukbo hmuhlet a nih bakah pawikhawihna a thlen nawn loh nan leh rel kawng siamna bungrua a bo lohna turin theih ang angin an vilpui a, rel kawng siamna hmunte tlawhin patrolling neih thin tih a sawi.
Northaast Frontier Railways-in Bairabi atanga Sairang Sihhmui inkar relkawng siam hna a thawh mekah rel kawng hian Kolasib district leh Aizawl district a kaltlang a. Heng district pahnih chhungah hian police station pathum area – Bairabi Police Station (Kolasib district), Kawnpui Police Station (Kolasib district) leh Sairang Police Station (Aizawl district) te a paltlang tih a sawi.
Rel kawng siam hna thawh meka harsatna leh thubuai lut awmah Mizoram Police chuan theihtawpin hma a la thin a. Sairang P/S, Kawnpui P/S leh Bairabi P/S-ah rel kawng siam kaihhnawihah thubuai 28 ziahluh tawh niin, thubuai hmasa ber hi 2018 March 22-ah Kawnpui P/S a ziahluh a ni a, thubuai thar ber chu Bairabi P/S ah kumin March 9 khan ziahluh a ni tih Mizoram Police hian an sawi.
‘Heng zinga thubuai 26 chu rukruk kaihhnawih, thubuai dang 2 chu invau leh insuam case a ni a. Bungraw bote hi rel kawng siam hna thawktute camp bulhnai leh hmanraw dahkhawmna hmun atanga bo a ni tlangpui a, rel kawng atanga bo a awm lo a tih theih. Chuvangin hnathawktute hriat loha rukbo chu a harsa tlangpui ang,’ a ti. Rel kawng siamna hmanrua bote hi bungraw rit tak tak – steel shuttering, heavy duty MS pipe, drain slab, bridge steel gate, steel plate, copper cable, channel leh hook bolt te telin mi pakhat tana ruk mai theih a nih loh bakah motor-a phurh sawn ngaite an ni tih a sawi bawk.
Thubuai ziahluh kaihhnawihah hian thilsual titu mi 62 man an ni tawh a. Thilsual titu man zingah hian hnamdang 14 telin, thubuai thenkhatah phei chuan a thawktute pawh pawikhawihtu an ni tih hriatchhuah a ni a, thubuai ziahluh 28 atang hian thubuai 19-a bungraw rukbo hi police-ten an hmu let tih a sawi a ni.
‘Thilsual titute chhuichhuak tur leh thil rukbo hmulet leh tur hian police-ten theihtawp an chhuah thin a. Thil bo na hmunte uluk taka endikin, rel kawng siam hna thawktute bakah a bulhnaia awmte uluk taka kawm thin an ni. Thirchhe leikhawmtute dawr zawng chhuakin rukruk thil ni ngeia rinhlelh zuar an awm leh awm lohte uluk taka zawhfiah thin an ni. Rel kawng siamna hmuna thawktute leh an hotute pawh biakpawh thin niin, harsatna an neih chuan Police Station-ah hriattir thuai tura hrilhhriat thin an ni,’ thuchhuah hian a ti.