Rel lutah party 3-in lawmthu sawi Congress party-in a hriatpui ve lo
Mizoramah Sairang thleng rel lut thei ta chu vawiin – September 13 hian Prime minister Narendra Modi chuan a hawng dawn. Mizoram-a political party pathum – ZPM, MNF leh BJP president theuh chuan lawmawm an tihna thuchhuah intawm an siam a, Congress party chuan hetianga thuchhuah intawm siam thu hi a hriatpui ve lo tih sawi a ni.ZPM, MNF leh BJP president thuchhuah intawm chuan, Prime minister-in Bairabi atanga Sairang thleng rel kawng siam thar a hawng tur hi inlungrual tak leh rilru thuhmun pu in lawmawm an ti hle tih a sawi a. Mizoram chanchinah bung thar kaipuitu, India ram dang zawng nena kan inzawmna tinghettu tur, ei leh bar, khawsak hona leh hnam nunphung inhriat tawn kawnga hmasawnna thlentu a ni dawn tih an sawi.
Rel kawng peihfel a ni ta hian Mizoram mipui tan rang, him leh man man zawka zin veivah theihna a siam dawn rualin, insumdawn tawnna, eizawnna leh khualzin hip kawngah hma thar a kai pui dawn tih an sawi bawk.
“He hun chhinchhiah tlak takah hian, hmathlir ram atanga a tak ram chantirtu sawrkar laipui, Mizoram sawrkar leh a kaihhnawiha tha thawhtu zawng zawng chungah kan lawm a. He hlawhtlinna hi nghakhlel taka lo thlawpa thawhpuitu Mizoram mipui tan a ni a; keini, political party-te hian he hmasawnna thar hi kan lo lawmin, kan state hma hun atana thawhhona tha leh hmasawnna thlentu a nih ngei kan duhin kan beisei a ni,” tiin party pathum president thuchhuah hian a tarlang.
The Aizawl Post-in a biakpawhnaah Congress party hruaitute chuan, hetianga political party president-ten rel kawng hawn tur chungchanga thuchhuah intawm siam a nih tur hi hriattir emaw sawm emaw an ni lo tih an sawi.
Tarlan tawh angin, vawiin – September 13 hian Prime minister Narendra Modi chuan Bairabi – Sairang railway line thar a hawn rualin Mizorama sawrkar laipuiin project lian a kalpui tur paruk lungphum a phum nghal dawn a. Zingkarah thlawhna in Delhi atangin Mizoram a rawn pan anga, Lengpui Airport atangin helicopter-in Thuampui Helipad-ah a tum ang. Heta tang hian lirtheiin Lammual a pan anga, a tih tur a tih zawhah Thuampui Helipad atang hian helicopter bawkin Churachandpur Manipur a pan dawn a, hei hi Manipur-a Zohnahthlak leh Meitei intihbuai hnua he state a tlawhna hmasa ber tur niin, tun tumah hian Zohnahthlak chenna lam Churachandpur district chauh hi a tlawh dawn nia hriat a ni.