Remna a tlo chhan

Urhsun takin Remna Ni chu kan hmang liam leh ta. Remna a lo thlen dan pawh Mizoram mipuite chuan kan hre bel viau tawhin a rinawm.
Nimina Remna Ni hmannaah chief minister chuan, India state dangah pawh remna hi lo ziah fo tawh a nih laiin a tluantling thei tak tak lo \hin, tiin a sawi a. ‘A mamawhte tana remna palai kan nih ve theihna tura Mizo hnamte Pathianin a pek’ tiin a sawi hial a ni.
Remna leh muanna hlutzia kan hriat rualin, heti taka remna leh muanna a tlo chhan pawh hi kan hriat chian a pawimawh bawk awm e.
Nimina Aizawla Remna Ni hmanna kaihruaitu chief secretary-in remna leh muanna vawiin ni thlenga chhawm nun a la nih chhan a sawi, ‘mipui inpumkhatna leh mihring dikna chanvo ngaihpawimawh vang’ tih hian remna a tlo chhan chu a khaikhawm thawkhat awm e.
Kan \henawm state Manipur-a buaina a lo chhuah chhan hi, an state chhunga cheng mipuite inkarah inpumkhatna \ha a awm loh vang a ni a. An state chhunga ‘tlangmite leh phaizawla chengte inthliarna’ avangin mihring dikna chanvo leh sakhua thlenga indiriamna rapthlak tak a thlen phah mek a nih hi.
Kan state chhungah hian inthliarna awm lovin inpumkhatna \ha tak a awm a, Manipur state anga political thila inthliarna ang pawh awm lovin, inpumkhatna \ha tak hnuaiah kan khawsa mek a. Hengte hi a hlutzia a lo lang chiang deuh deuh a tih theih awm e.
|henawm state-a buaina a thlen dan a taka hmu mektu \halaite, Mizoram buai lai a taka tawng pha ve lo tan pawh, remna leh muanna neih a hlutzia a hriatthiam theih bawk ang.
Kum 20 chhung Mizoram buaina kha a namai lo a, remna leh muanna a awm theih nana kawng hrang hranga mi hrang hrangin theihtawp an chhuah dan pawh kan hre vek a, a kawng a bumbohin a thui hle tih pawh kan hria. Remna leh muanna a awm theih nana khati khawpa hmalakna urhsun leh kawng thui tak zawhna kha Chunglam pawhin mal a sawm a nih a rinawm.
Buaina a lo chhuah dan te, a hnua remna a lo thlen leh dan te kha, \hangthar zelte hian an zir chian a, an hriat chian zui zel hi a pawimawh a. Ram buaina thleng kha tu mahin ‘thleng se’ kan ti hauh lovang; chutih rualin kha buaina kha kawng lehlamah chuan chhawr \angkaina tur tam tak a awm ve tho. Thufingin, ‘tawrhna phena malsawmna’ a lo tih angin, tawrhna hi a \angkai zawnga hman thiam chuan malsawmnaah a chang thei a ni.