Remna leh muanna hlutna

Kum sawmhnih chhung zet rambuaia kan awm hnuah remna leh muanna a lo awm leh a. A taka ram buai lai tawng pha chin chuan ram buai hreawmzia leh rapthlakzia an hmuin an hria a, remna leh muanna hlutzia pawh, a taka buaina tawng pha ve lote ai chuan an hrethiamin an hlut thiam zawk ngei ang.
Hetia remna leh muanna boruak hnuaia kum 37 zet hun kan hman liam tawh lai hian, kan thenawm ram buai avangin kan unau Zofate chuan Mizoram an rawn pan ve thung a. Tunlaiah thiamna a san tawh em avangin social media kaltlangin kan thenawm rama buaina leh harsatna thlen dan kan lo hriain kan lo hmu ve zung zung thei a; rambuai lai tawng pha lo tunlai mite pawhin, tunhmaa ram buai lai rapthlak turzia pawh an suangtuah thiam phah ve thei deuhin a rinawm. Manipur state buai mek boruak atang pawhin kan state ralmuanna hlutzia hi thalaite pawhin an hriatthiam phah ngeiin a rinawm.
State ralmuang kan ni tiin chhuang takin kan ram hruaitute pawhin an sawi thin. Remna leh muanna hnuaia engkim mai thawk thei leh ti theia awm hi a hluin a ropui a, hma pawh kan sawn phah; remna leh muanna hi a chhuanawm na rawh e; i hlut thiam ang u.
Hetih lai hian, he remna leh muanna boruak hi kan hman thiam erawh a ngai a, kan hmang thiam em tih pawh hi inenfiah ve fo a pawimawh. He ralmuanna hi thil dik lo leh thil sual ti duhtute tan chuan ‘remchanna’ (advantage) tha tak a ni hlauh thei. Ram pahnih karcheha awm, international border pahnih nei kan ni a, ruihhlo leh ralthuam, dan phal loh chi hrang hrang thiarvelna kalka berah kan awm mek niin a lang a, kan ralmuang leh lutuk hian ramri venhim lamah kan lo inthlahdah phah ang tih a hlauhawm hle a ni.
Silai rik lohna, hel awm lohna leh tharum thawha inrikrap awm lohna ram ralmuang kan tih hi, corruption hluarna, ruihhlo hluarna, zuk leh hmuam hman nasatna, cancer vei tamna leh HIV/AIDS hluarna a nih miau si chuan, heng laka remna leh muanna nei tura beihpui thlak sauh sauh hi kan la hmabak niin a lang.