Remna Ni puala inelna

Kumina Remna Ni champha lawmna puala zirlaite tana essay inziahsiak leh quiz huaihawt a ni hi a lawmawm hle a. Inelna thupui atana “Political History of Mizoram: 1947 (post independence) to 1987 (statehood i.e 20th February 1987)” tih hman a ni lehzel phei hi chu a remhriatthlak hle. Hei hian zirlaiteah mahni ram chanchin hriatna thuk zawk a tuh ang a, chu chuan ram dinhmun ngaihsakna leh ram leh hnam tana inpekna rilru (nationalism) a neih thartir a rinawm a ni.
Khawvel hmasawnna leh changkannain a hrinchhuah thalaite inawmtleina electronic hmanrua (gadget) leh intihhlimna (entertainment) chi hrang hrang a tam luattuk tawh avang hian thalai zirlaite hian history leh environment thil pawimawh ngaihven chu sawi loh, an zirlai pawimawh em em pawh zir thiam tha thum lovin heng thil inawmtleina thil hrang hrangah hian an hun an pe nasa tawh a. Hetiang atchilh laileng tawh chuan kan khawvel hman mek ningkhawng hi an hre meuh tawh lo va, hun kal tawh chanchin (history) hriatna lamah phei chuan an zirlai ami pawh an bel hleithei tawh lo achha a ni. An atchilh leh an buaipui, games chi hrang hrang, fashion, video music, movies leh entertainment, etc. an hriat em em laiin, mahni chenna ram chanchin ber hre lovin an awm leh tlat lawi si a ni.
Hetianga thupui pawimawh neia inelna huaihawt a nih thin hian, zau zawka mipui pawhin an lo hriat a, an chhawr tangkai theih tura chhawpchhuah zui kawngah hian kan harh thar a pawimawh bawk awm e. Department hrang hrangin issue pawimawh tak tak behchhana inelna (essay writting, painting etc) an huaihawt hian, lawmman an sem a, an duhtawk zui deuh mai thin niin a lang a. Entir nan, essay or short story inziahsiak te phei chu, hautak lo tak leh awlsam takin publication siam a, mipui thleng tura ruahman theih a ni a. Mipuiin an lo hriat zau ve zel khan hriatna a tipungin ngaihtuahna thar a siam a, chu chu inelna lawmman atana insenso chhan tur leh a hlawhtlinna tur ber pawh a ni ang.