Remna Ni pualin thisen pe dawn Zoramin remna a ‘champion’ pui – CM

Chief minister Zoramthanga chuan hun rei tak chhung hreawm tak leh nunna sang telin an chan hnua Mizoramin remna a nei thei ta chu thil ropui tak a nih thu sawiin hnam dangten an la neih ngai reng reng loh remna chu Mizoramin a ‘champion pui’ tih a sawi.
Mizoram sawrkar General Administration Department leh Association for Voluntary Blood Donation leh Central YMA tangho in Remna Ni pualin kumin June thla chhung hian thisen pek runpui an butsaih dawn a. A khuh hawnna hmanpuitu chief minister chuan rambuai avanga tawrhna nasa tak kan tawh dan leh hnam chhan nana mi tam takin an nun an hlan thute a sawi a. Chu’ng mite inhlanna avanga remna leh muanna kan neih tak chu kan vawnhim zel a pawimawh, tiin, India hmarchhaka ram buai ber thin kha tunah muanawm bera kan chang ta chu Pathian kaihhruaina leh remruatna a ni tih a sawi. “Hun khirh tak kan lo paltlang tawh kha hrerengin, midang tan remna thlentu kan nih ve a tul tawh a ni,” a ti.
Ram thenawma awm Bangladeh leh Myanmar bakah Manipur state-te chu kan ramin buaina nasa a tawh laia ram buai tawk ve lo an ni tih a sawi a. Tun dinhmuna heng thenawm ramten buaina nasa tak an tawh laia ralmuang taka kan awm chhan chu Pathianin remna tha bik, ramdangte awh ngawih ngawih min pek vang a nih thu a sawi bawk.
Thisen pek chu kan mihring puite tana kan tih theih hlu ber a ni, tiin, a tam thei ang ber thisen pe turin chief minister hian mipui a sawm a ni.
Central YMA president R Lalngheta chuan thisen pek chu mihringte tan thil hlauhawm ni loin, thil tha zawk a ni tih a sawi a. Thalaite chu thisen pe ve thei ngei tura an nun uluk a, ruihtheih thil leh zuk leh hmuam laka fihlim tum turin a chah.
A hawnna hman zawh hnu hian programme chhimtu high school zirlai, kum 18 tling tawh thenkhatin thisen an pe nghal a. Remna Ni puala sawrkarin programme hrang hrang a ruahman zingah high school zirlaite tan district tina quiz competition buatsaih, higher seconary school zirlaite tan district tinah essay writing competition buatsaih, I&PR department kaltlanga Remna Ni thupui hmanga painting leh photo exhibition neih, Forest department kaltlanga thingpui phun runpui neih, UD&PA department kaltlangin district headquarters tina faina beihpui thlak, digital flyer and short video competition buatsaih leh a dangte a tel a. Districtt hrang hrnagah Blood Donation Drive hi neih tum a ni bawk.