Mizoram Rajya Sabha MP K Vanlalvena chuan Champhai district khaw thenkhat Vaphai, Farkawn leh Zawlsei tlawhin Myanmar raltlante awmna leh an dinhmun a en.
MP chuan MNF sawrkarin raltlante a lo tanpui chhan hi vote hmuh belh beisei vang a niloa, unauten tanpui an mamawh tih an hmu a, an tanpui mai zawk a ni a. Chu chu Mizo Kristiante nunphunga bet a ni tih a sawi. Khawtlang hruaitute leh NGO hruaitute bakah mipuiin raltlante hmangaih taka an lo tuamhlawm thin chu Pathian duhzawng a ni ngei ang tih a rin thu a sawi bawk.
Vaphaiah hian khawtlangin an buatsaih, Vaphai High School leh Higher Scondary School atanga HSLC leh HSSLC exam-a an pass kim vek lawmna chu K Vanlalvena hian a hmanpui a. Zirlaite chu hmalam huna hlawhtling turin mi awmthei fa nih leh mirethei fa nihin danglamna a nei lo, tiin, rilru mumal tak nei chunga tumruh taka zir turin a fuih. Vaphaia Myanmar raltlan zirlai awm mekten hnamlam an lo entir a ni.
MP hian Vangchhe daia Kawtchhuah Ropui a tlawh nghal a. He hmuna lungphun leh pipute sulhnu chi hrang hrang chu “kan pi pute sulhnu ngei a ni tih rinhlelh tur a awm lo,” a ti. Mi thenkhatin Hindute sulhnu niawm taka an sawi thin hi thil hriatchian loh vang a nih a rinawm thu leh India ram hmun hrang hranga hmanlai Hindute lungphun leh Vangchhia khaw daia lungphunte hian inlaichinna an neih a rinawm loh thu a sawi a ni.
MP-in Myanmar raltlante tlawh
Get real time updates directly on you device, subscribe now.