Renewable energy lam uar tul

Assembly session hnuhnung ber August ni 23, 2023-ah khan power minister chuan house member zawhna chhangin, Mizoram sawrkarin hmun hrang hrang atanga kawlphetha leina a bat tlingkhawm zat chu cheng vaibelchhe 124 chuang a nih thu a sawi a.
Khawvel hmasawnna thang zel hnuaiah Kawlphetha mamawhna hi a pung chho zel dawn a. Hmasawnna thar kan duh a, kan nei mek zel a, heng hmasawnna tharte hian power an mamawh belh zel dawn a, chumi phuhru tur chuan power hi state dang atangin lei belh zel a ngai dawn tihna a ni a. Hei hi a chhan pawh kan hre vek a, power siamchhuah lamah kan la hnufual vang a ni. Power leina man hi mipui hnenah subsidized zel a nih avangin power chawkluhna man tam zawk hi chu chhiah tlingkhawm (sawrkar sum) hmanga lei a ni a. Hetiang zela kan kal reng chuan, state-in power siam chhuah kan neih belh bawk si loh avangin, sawrkar leibat hi a pun belh zel mai dawn tihna a ni awm e.
Kan state-ah hian power siamchhuahna tur potential tha tak tak (lui khuah tur) a tam tih chu hruaitute sawi dan a ni thin a, tunah pawh hian lui pali panga khuah tumna project chu bawhzui mai theih tur a awm mek nia sawi a ni bawk a. Hetih lai hian kan ram zimte hi tuikhuah tam tak siamna chi pawh a ni lo, kan environment tichhetu tur a ni a, kan environment ber kan tihchhiat belh zel chuan phurrit leh tawrhna kan insiam belh chho zel mai dawn a ni, tiin environmentalist lamin an lo sawi ve bawk a; kan dinhmun hi a khirh hle a ni.
Hetih lai hian, renewable energy siam chhuah lamah pawh Mizoram hian potential tha tak a nei a, chumi avang chuan Mizoram sawrkar pawhin “Solar Power Policy of Mizoram – 2017” a lo siam phah ta kha a ni a. He Policy hi a that viau rualin, hman tangkai lamah kan hnufum hle lawi a. He policy hnuaia Solar Rooftop Projects phei chu sawrkar department office-a uar zawka hman nise tihte kha a ni a, Mizoram Legislative Assembly House hian hma a han hruai a, mahse sawrkar office dangte hian an zui tha vak lo.
Power lama harsatna kan tawh mek dan hi a hrechiangtu ber chu ram hruaitute leh sawrkar hnathawkte hi an ni a, ‘heti zawk hian’ tia kawng dang han dap zung zung lamah hian kan vuaicha hle niin a lang. Renewable energy lam hi kan bawh uar a pawimawhin a tul takzet tawh a ni.