Rev Lalnghinglova a chawl ta

Rev Lalnghinglova a chawl ta
Mizoram Presbyterian Kohhran pastor dam laite zinga upa ber tia sawi thin Rev Lalnghinglova chu Nilaini khan a boral a, Ningani hian Mission Vengthlang Presbyterian Kohhran biak inah amah thlahna hun hman a ni ang.
Rev Lalnghinglova hi 1926-a piang a ni a, Rev Lalchama nen Pro Pastor tih hming pu hmasa ber niin, 1954-ah Pro Pastor an ni tan.
A nausen laiin a nu leh pain tirhkoh atana an hlan a ni a, pawl 6 a zir laiin Pathian kohna a dawng. Zosap missionary-te bula seilian a ni a, matric pawh kohhran chawma zir a ni. Rev Lalchama nen tirhkoh atana lak an ni a, Pro Pastor tih hming an pu ta a ni. ATC librarian tih hming pu hmasa ber a ni bawk.Cherra Theological College chhuak a ni. Hmun hrang hrangah rawngbawlin a awm a, Synod Secretary te pawh a ni tawh.
1989-ah a pension a, a chawlh hnuah pawh sikul principal hna a thawk leh a ni.
Rev Lalnghinglova hi thuziak lama inhmang a ni a, lehkhabu pariat a ziah bakah mi dang nena inziah tawm pakhat a nei bawk. A lehkhabu pakhat “Zoram Nghahchhan” tih phei chu ngainat hlawh leh rawn hlawh tak a ni.
A nupui Saikungi nen fa pasarih an nei a, a fa upa ber Lalhruaitluanga Ralte chu thuziak mi a ni. A makpa Rev Dr Vanlalnghaka Ralte chu Synod Moderator hlui a ni.
Mi hlim thei, mi invawng thei mi a ni a, Covid-19 vanga biak in khar a nih lai pawh khan tar chak lo tak a ni tawh chungin Chawlhni-ah chuan a inkhawm thawmhnaw inbelin uluk takin a inchei thin. Hrilen hma pawhin, a upat hnuah a inkhawm theih lohvin Chawlhni-ah chuan inkhawm thawmhnaw an inbel thin. Tar chak lo a nih hnu thlengin Tumkau Ni-ah kawng a la zawh peih.
Rev Lalnghinglova hian a upat tawh vangin enkawl a ngai tih bak insawiselna em em a nei lo a, Nilaini pawh khan tha takin tukthuan a la ei. A chaw ei kham hi a chawl zui ta mai a ni.