Rilruna chhawk nan paracetamol

Ngaihzawng then vanga rilruna hi nachhawkna damdawi paracetamol pawhin a chhawk ve thei e, an tih tlat chu!
University of California-a neuroscientist ten zirchianna an neih tharah chuan rilru na te hi taksa na te ang bawkin thluaka an thawhna hmun a inang niin an sawi a, chuvangin ngaihzawng nena inthen vanga rilru na te pawh nachhawkna damdawi hmangin a chhawk theih niin an sawi.
Neuroscientist-te hian mi 62-ah kar thum chhung enchhinna an nei a, Tylenol (American-ho paracetamol) emaw nachhawkna ni lo thildang dang emaw te an eitir a, tichuan zantin an awmdan leh rilru puthmang te an teh leh ta thin a ni.
Zirchianna neitu te chuan paracetamol 1,000mg (chu chu mum hnih ang vel) ei te chu nachhawkna ei ve lo te aiin an rilru a hahchawl/ hahdam zawk a, an rilru nat dan te pawh a ziaawm zawk niin an sawi.
Hei bakah hian computer game chikhat, an rilru tina thei tur an khelh tir a, chutih lai chuan an thluak an lo scan reng bawk. Chuta tanga a lan dan chuan rilru na leh taksa na (physical pain) te min hriattirtu thluak hnathawh chu a inang reng, niin an sawi bawk.
He zirchianna chungchang hi Daily Mail-ah tihchhuah a ni.