RLB grant dawn that vangin AMVCA lawm A hmanna lam enpui turin mipui an ngen

Village council-ten khawtlang hmasawnna atana sawrkar laipui atana puihna an dawn thin – Rural Local Body grants chu hun engemawchen an hmuh theih loh hnu ah tunhnaiah sawrkar puihna in an hmu tha leh ta a, an lawm hle tih VC Association chuan an sawi a. Vc tinin tangkai taka khawtlang tana an hman theihnan a hmanna lam enpui a, tha lo a awm a nih chuan thuneitute hnena hrilh hreh lo turin mipui an ngen tih an sawi.All Mizoram Village Council Association (AMVCA) hruaitute chuan RLB grant an hmuh that avanga an lawm thu hi an sawi a. AMVCA president FP Lalkhama chuan, kum 2021 atanga 2026 thleng, 15th Finance Commission-in Mizoram tana RLB grants dawn tura a ruahman hi a vaiin cheng nuai 36200 a ni a. 2021- 2022 hian 1st installment cheng nuai 3450 an la a, sawrkar kum khatah instalment hnih zela an lak tur chu an la thei lo zui ta tih a sawi a ni.
An lak theih loh chhan hi, state sawrkarin sawrkar laipuiah ‘audit- online’ a tih a ngai a, hemi a tih phawt loh chuan instalment dang hi a pechhuak thei loa, Mizoram sawrkarin hei hi a tih hleihtheih tak loh vang a ni ber tih a sawi.
Tuna sawrkar mek hian central-a a bawhzui sak a, central duh dan angin audit online hi tih a ni a; hemi hnu hian an grant dawn tur hi an dawng chhunzawm leh thei ta chauh nia sawiin, 2021- 2022 2nd instalment atangin, 2025- 2026 thlengin instalment 10-a an lak tur chu an dawng chho ta zut zut niin a sawi a. Central-ah an hnathawh dan hi a thlalak nena thehluh zel a ngaih avangin VC-ten khawtlang hmasawnna tur leh ruhrel din kawngah tan an lak phah nasa hle tih a sawi bawk.
“Grant kan dawn chhoh theih tak zel chhan hi, sawrkarin sum dik leh fel taka a enkawl avangte, grant hmuhna atana document ngai ho chak taka a bawhzui zel avangte a ni,” a ti.
Tun sawrkarin kum hnih leh a chanve chhunga 15th Finance Commission ruahman anga 2021-22 to 2025- 2026 sawrkar kuma installment an hmuh zawng zawng chu installment 9 niin, a sum zawng chuan nuai 32750 a ni tih a sawi a. A hmaa an lo dawn tawh nen an dawn tur zat – nuai 36200 an dawng kim ta chu an lawm hle a. Chief minister Pu Lalduhoma, Rural Development & Administration minister Prof Lalnilawma leh a kaihhnawih department thawktu zawng zawng chungah lawmthu an sawi tih AMVCA president hian a sawi a ni.
AMVCA hruaitute chuan, an sum dawn hi khawtlang hmasawnna atan tangkai takin an hmang thei tih sawiin, mipui pawh khawtlang hruaituten khawtlang hmasawnna hnathawh kawngah theihtawp chhuaha tawiawm a, a dik lo leh fel lo a lo awm palh a nih chuan khawtlang hmangaihna avanga thuneitute hnena thlen hreh lo turin an ngen tih an sawi a ni.