RM Chakma khan ZPM zawm a lo tum tak tak lo? A luahlanin ZPM zawm mai thei, MNF buai zui

On Oct 5, 2023 11 0

Chakma Autonomous District Council (CADC) CEM
(Chief Executive Member) RM Chakma leh amah zuitute ZPM-ah an lut dawn emaw tih laiin an thulh thut a, ZPM-a luh kha an lo tum tak tak lo nia ngaih a ni leh tawh.
RM Chakma hi inthlanpui lo awm turah Tuichawng biala MNF candidate a ni dawn a, mahse CADC-ah MNF an buai zui nghal.
Tuichawng biala ding tur hian MNF-in DD Chakma an lo tifel tawh a, October ni 2 khan hei hi tidanglamin RM Chakma an ruat thut. RM Chakma leh ZPM inbiakna a tawp nghal a, DD Chakma hi ZPM nen an inbe zui ve leh. ZPM hian Tuichawng biala ding tur an la nei lo.
DD Chakma leh a pawlte hi Aizawlah an cham mek a, Nilaini tlaiah khan ZPM leader Lalduhoma te nena inbiak an tum tih thu dawn a ni.
RM Chakma leh DD Chakma te hian Tuichawng biala din an tum ve ve a, party-in DD Chakma an thlan fel hnuah RM Chakma hian ZPM-a luh tumna thawm an nei ta a ni.
Chawngte atanga thu dawn danin, RM Chakma leh a pawlte hian ZPM-a luh kha an tum tak tak lo a, ‘seat’ kar nan khatiang thawm kha an nei. “ZPM-a luh kha tum tak tak se chu a hma daihin an lut tawh ang. Party-in Pu DD Chakma an tihfelna a rei tawh a, candidate puan dawn hnaihah ZPM nena inbiain thawm an nei chauh alawm. Engah nge a hma khan ZPM hi an lo dawr loh?” CADC-a party mi pakhat chuan a ti.
RM Chakma hi MDC 16 neiah a inchhal a, pali kha ruat seat-a lut an ni. Thlan tlin MDC 12 a nei a, tunah chuan pariatah an tla thla tawh tih thu dawn a ni.
MDC thlan tlin 12 zinga palite chu DD Chakma lamah an kal tawh a, mi dang pahnih pawh kal leh thei dinhmunah an ding nia hriat a ni.
MDC bial 20 awmna CADC-ah hian MNF candidate 10 an tling a, BJP atanga tling mi panga zinga pali leh Congress atanga tling mi panga zinga palite’n MNF zawmin, MNF hian MDC 18 an nei. Mi 18 zinga 12 chu RM Chakma lamtang, MLA candidate atana duhtu nia ngaih an ni a, mahse palite chu an inlet leh a nih chuan RM Chakma hian pariat a la nei tihna a ni ang. CADC inthlana tling lo mi 10-te kha DD Chakma duhtu an ni ve thung a, CADC-ah palian ve ve an ni. Thu dawn danin, DD Chakma leh a pawlte hi ZPM-ah an lut a nih chuan MNF an phel tihna tluk a ni thei a, party atanga an chhuak lo a nih chuan MNF chhungkua an buai tihna a ni thung ang.
RM Chakma leh a pawlte hi ZPM chuan Nilaini-a lawmluh kha an tum a, Aizawla an hruaitute pawh he hun hmang turin an chhuak hman. An tum leh lo tih thu Lunglei-ah an hria a, Lunglei atang hian an kir leh a ni. Thawhtanni tlaiah khan RM Chakma hi MNF president nen phone-in an inbia a, chumi hnua ZPM nena an indawrna hi an titawp nghal a ni.