Ronaldo a va talbuai tehlul em!

A elpui kumhlun Lionel Messi tihte’n a record ropui khuma World Cup-a hat-trick siam thei upa ber nihna harsa lo angreng taka an hlawhchhuah mai mai laiin Nilaini zanah Portugal captain Cristiano Ronaldo chuan 1-1-a an inhnehtawkpui ringawt Democratic Republic of Congo lakah goal a khung zo lo tluanchhuak a; a vawi kahtna atan tunhma lama Zaire tih ni thin DR Congo-in FIFA World Cup goal leh point an hlawhchhuah zanah a pawlte a chakpui zo lo.
Kum 43 mi ni tawh Ronaldo hi a tha a thum ve ta deuh em ni tih zawhna a piang leh thin a, World Cup match-a first eleven chang thei upa ber nih rikngawt hi khelmual chhunga eng teh ual nih leh si loh chuan a ropui lem loa ngai an awm thei bawk awm e!
Kum 2006 atanga World Cup khel tan Ronaldo tan kumin hi World Cup vawi ruk a khelhna ni tawhin, Messi nen bawk World Cup-a inlan rei thei ber an ni dun mek.
Nilaini zan FIFA World Cup Group Stage – Group K inkhelah khan Houston Stadium-a mipui 68,777 chhuak khawm hmaah Europe champion Portugal lamin goal thun mai an harsat lo a, tan atanga minute rukna lekah Pedro Neto chhawpsak atangin Joao Neves chuan hmahruaina goal a tilut.
Cristiano Ronaldo leh a pawlte hian sikhat faia hmahruai chung leh second half-a khung belh law law turin half time chawlh an hmang dawn emaw tih hnu first half hun pekbelh tawp dawnah Yoane Wissa chuan Arthur Masuaku siamsak atangin African team siphurh sutna goal a tauhlut ve nawlh a; kha goal khat hmang khan kum 52 hnua World Cup khel tura kir ve leh thei chauh Congo-in champion tur hiala rinkai pha zinga mi an inhnehtawkpui!
Portugal coach Roberto Martinez-a team-in hun khirhkhan leh harsa an tawh laia chhanchhuaktu ropui ni tura beisei kumkhua Ronaldo lah chu a thiante’n ball zawnsak tluanchhuak parh mah se a goal thun thei lo mangang a ner nawr reng ringawt a, Gongolese ruakhau pui pui karah nu hah an sawi ang maiin khelmuala tluk niai a nei fo!
Inkhelh banah Martinez chuan a naute’n goal chance siamchhuah an harsat tih sawi chungin an hun tha hmuh chhunah pawh an goal hnihna tilut turin tumn tak tak an tlachham nia a ngaih thu hial a sawichhuak!
DR Congo inkhel lai kha stadium chhungah ngei an ram president Felix-Antoine Tshisekedi Tshilombo chuan a thlir a, an president hmuh lai ngeiin ven loh Wissa chuan an ram chanchina World Cup goal hmasaber a tauhlut zui ta a ni.
DR Congo coach Sebastien Desabre chuan an ram chanchina World Cup goal leh point hmasaber an hlawhchhuak kha an tan hmasawnna a nih thu sawi chungin Portugal lakah khan an engkim an hlan tih a tarlang tel.
Portugal bultanna inkhel kha nikum car chesuala thi ta an team-mate hlui Diogo Jota nu leh pain a hmunah an tawiawm ve thung a, Jota vang pawha chak tum Portuguese-ho thiampuipa ber Ronaldo a chet fuh zawh ngang loh avangin point thum hum chung chuan bul an tan zo ve ta lo a ni – Messi leh a pawlte angin!
Ronaldo kha DR Congo defender palian pui puiin an chan hneh em avang leh hmunawl zeuh pawh an pek that duh tlat loh avangin a khelh hrim hrimah pawh a ropui lo a, ball pawh a chang tam thei lo a, box chhunga a beidawng lai kan thlirliam a ni ber!
Portugal an sut leh tur Uzbekistan leh Colombia laka chetthat zawk an mamawh dawn a, Ronaldo tana trophy lian la hmin lo awmchhun sualchhuahpui an duh tak tak a nih chuan an tan deuh tawh a ngai ang!
Kum 2022 World Cup-ah pawh khan quarter-final stage-ah African team dang Morocco chuan an lo pet chhuak tawh a; kum 1966 daih tawha pathumna an hauh kha he tournament-a an thlensan ber tum a la ni.