Footballer ropui Cristiano Ronaldo a ropui zel a, Ninga zanah Al Nassr tan goal li goal a thun hmangin Ronaldo hian club tan goal 500 a thun tling a. Football khawvelah hnuhma ropui dang a hnutchhiah belh leh.
-- Advertisement --
Saudi Arabia club hausa Al Nassr in footballer hlawh hnem chungchuang ni tura an lak luh Cristiano Ronaldo hi ninga zan khan a club thar tan a che ropui hle a, Al Wehda lakah goal li ngawt a thun. Ballon d’Or vawi nga ngawt dawng tawh Ronaldo hian Al Nassr tan minute 21-naah hmahruaina goal a thun a, he goal hi Al Nassr tan a goal hnih thunna chiah a ni. Hmahruaina goal a thun hnuin a chetha zui zel a, minute 40 naah an goal hnihna a thun belh zui leh a, si hnih faia hmahruai chungin chawlhlawk an hmang.
Chawlhlawk hnu lamah pawh mualneitu Al Wehda an insiamtha thei chuang lova an chesual leh thuai. Minute 53-na lekah penalty an chawi leh nghal. He penalty hi goal hnih thun tawh Cristiano Ronaldo chuan chiang zetin a pet goal a, a club thar Al Nassr tan a vawikhat nan hattrick a siam. Ronaldo hian hattrick siam tawh mah se a la duhtawk mai lo. Minute 61-naah an goal lina a thun zui leh bawk. Hun tawp thlengin mualneitu Al Wehda in an si phurh an sut thei lo va, Ronaldo goal li thun chu an tualzawlah ngei an tlawmpui zui ta a ni.
Al Nassr tana goal li thuntu Cristiano Ronaldo hian club tan goal 503 a thun tling ta chiah a, goal thuntu ropui a nihna a nemnghet lehzual. Al Wehda laka a goal khatna kha club tan goal 500 a thun tlinna chiah a ni a, goal thum a thun zui leh hmangin goal 503 a puitlin zui chiah bawk.
Kum 38 mi Cristiano Ronaldo hian a club hmasa Sporting Lisbon tan goal thum a thun a, vawihnih a zawm tawh Manchester United tan goal 103, Real Madrid tan goal 311 zet a thun a, Serie A club lian Juventus tan goal 81 a thun bakah Al Nassr tan goal li a thun tling tawh bawk.