I chhungten i nupui/pasal kha an ngeih loh tlat chuan i tan pawh awmthiam a harsa a, hrehawm tihchang i ngah hle thin ang. Chutiang boruak chu i tawng a nih chuan rilru hah leh beidawng a indawm kun mai loin, tihdan tha a awm niin relationship lama mithiam ten an sawi a, kan rawng tarlang e.
-- Advertisement --
1. A hmasa berah chuan nghah peih phawt mai rawh. I kawppui chu i dam chhung kawppui turin i thlang tawh tih an hriatthiam theih nan hun pawh a duh ve deuh ang. Hun te han kal deuh se i chhungte pawhin an rilru puthman thlakin boruak tha zawk a la awm ve thei tih hre reng ang che.
2. Eng nge a chhan tih hi zawn chhuah ngei a pawimawh. Innei rei tawh viau a, mahse, i chhungten an la pawm thei lo fo a nih chuan a chhan zawn chhuah tum ang che. I hriat lohin an lo inhau thin em? Eng nge i kawppui chu an ngeih theih loh tlatna chhan tih i hriat chhuah chuan i chinfel dan i hre thei ang.
3. I kawppui leh i chhungte chu titi pui ve ve rawh. A tha berah chuan inzavaiin thu khawm ula, in harsatna te sawi khawm theih a tha ber. Nangmah kha chet latu ber tur leh a chinfel dan tur ngaihtuahtu ber tur i ni. I chhungte leh i kawppui pawh chu an inhriatthiam lohna te an sawiho theihna tur hun siamthiam a pawimawh hle a ni.