Ronaldo record khumtu Bellingham

Pathianni zanah goal khat khung belh lehin Jude Bellingham chuan La Liga season kal laiah Real Madrid tan goal 14 thun tlingin, season tir lam league game 15 china Bernabeu club tana goal khung hnem ber record thar a siam.
England international lo lan hmaa record dinglai chu Cristiano Ronaldo, Alfredo di Stefano leh Pruden-te insiamtawm niin, goal 13 theuh an tihluh kha a tir lam match 15 chin hnuai lama Real tana league goal thun tam record niin, sithum faia mualneitu Cadiz an hnehna goal khat thawhtu Bellingham hian Spain leilunga a chetthat chhunzawmin a rawn khum ta a ni.
Pathianni zan inkhelah Brazil forward Rodrygo chuan minute 14-a goal hmahruai khungin, se-cond half tir lamah Luka Modric siamsak atangin Brazilian bawk hian a goal hnihna a tilut leh a; Real goal thumna erawh England midfielder Be-llingham chanpual niin, kum 22 mi Rodrygo siamsak hi a ni ve thung.
Kum 20 mi leka upa Birmingham City youth product Bellingham hian kumin nipui laia Borussia Dortmund atanga Spain a pan hnuah Madrid club tan Champions League goal thum a thun tlin tawh bawk.
Pathianni zana an point thum hlawhchhuah leh nen Real hian khelh 14-a point 35 hum chungin league table-ah hma an hruai a, he thu buatsaih lai thlenga game khata khel tlem Girona chu pahnihnaah chhukin, Barnabeu club nen hian point khat chiahin an inthlau.
Real Madrid hian in-ternational break laia inhliam forward Vinicius Jr an chhawr thei lo a, mahse, a chipui Rodrygo chuan a ai a awh zo khawp mai a, kum 2019-a Santos chhuahsana Real a zawm hnuah a zawna game thum chhung goal a khungna a ni nghe nghe.