Rs. nuai 100 chhiar lai Maoist hruaitu lawk man

Maoist hruaitu lawk, a luman pawh Rs. nuai 100 chhiar lai, Misir Besra chu Jharkhand-a Dhanbad-ah Thawhlehni zan khan man a ni.
Giridih-a Harladih-a cheng, Besra hi state hrang hranga Maoist chetna hrang hrangah thubuai nei lai a ni a. Maoist member pahnih, Mochhu leh Saurabh (Gaurav tia koh) leh thingtlang khaw mi pahnih nen Giridih-Dhanbad inrinaah man an ni.
Venhim hna thawktute chuan Besra-a hi kum tam tak chhungin Jharkhand, Bihar, Odisha leh Chhattisgarh-a Maoist chetna hrang hranga a ruahmana phiartu a ni tih an sawi a. ‘Most wanted’ list-a kum tam tak lo chuang tawh a ni a; tual thah, venhim hna thawktute beihna, mi thil laksak leh IED tihpuah telin thubuai tam tak a lakah ziah luh a ni.
Sorkar laipui leh state sorkar hrang hrangte man duh niin a luman pum hi Rs vaibelchhe 1 zet a tling a ni.
Besra-a hi mi huhang na tak niin Kolhan, Saranda leh Parasnath bawrah phei chuan ho a ngah hle a. An pawl kal dan tur duannaa an thluak bur pakhat a ni a, state hrang hranga Maoist inpawh leh inzar pharh dan ngaihtuahtu ber nia sawi a ni.
Tun hnaiah a mite inpe leh a thawhpui hnai tak takte man an awm nual tak avangin a inzar pharhna a chak lo ve hret hret a, hei hi venhim hna thawktute pawhin amah an chhui chhuah theihna pawimawh a ni bawk.
Venhim hna thawktute chuan Besra-a man a ni hian Jharkhand leh India khawchhak lama Maosist tichak lotu lian tak a nih theih an beisei a. Thuneitute chuan thu an zawh fiahna atangin an pawl hotu lian dang te, an ralthuam neih dan te, mi thil an chhuhsak dan te, an awmna hmun leh Naxalite la awm dangte an hriat belh theih an inbeisei.
A ruala man, Mochhu leh Saurabh te pawh Maoist-a tel tha tak nia hriat an ni.
Thingtlang khaw mi pahnih an man telte pawh an pawla an inhnamhnawih dan chhui zui mek a ni a. Police chuan an inzawm dan enfiah mekin an puih dante pawh chhui chhuah an tum bawk.
Thawhlehni vek khan Jharkhand Police hnenah Maoist 16 an lo inpe tawh bawk a, an zinga parukte phei chu an luman belhkhawm Rs nuai 39 tling an ni.
Inpe zinga mi, Basudev Da tih leh Dilip tia an koh, Santosh Mahto chu thubuai 128-a man duh lai niin luman Rs nuai 15 nei a ni a. Sub-zonal committee member pahnih leh area committee member pahnih an inpe tel bawk.