Rs. Vbc 52,000 man ralthuam leina tur pawm

Defence Minister Rajnath Singh-a kaihhruai Defence Acquisition Council (DAC) chuan sipaite theihna tihpun nan ralthuam leh system chi hrang hrang Rs vaibelchhe 52,000 man lei turin phalna a pe.
India-a ralthuam leina tura committee sang berin a pawmpui tak hian anti-unmanned aerial vehicle (UAV) electronic warfare system AKASH TARANG leh man-portable anti-tank guided missile (MPATGM) system atanga medium-range surface-to-air missile (MRSAM) leina tur thlengin a huam tih defence ministry chuan a sawi.
DAC chuan tank-te tana active protection system leh jet-based kamikaze drone system lei tur, very short-range air defense system (V-SHORADS) leh jet-based kamikaze drone system lei nan Acceptance of Necessity (AoN) a pe bawk niin ministry chuan a tar lang tel.
India-a ram venhimna lam thil leina tur dan hnuaiah council-in AoN a tih hi sipai hmanrua neihna kawnga hmalakna hmasa ber a ni a. DAC hi India sipai hotu thar, Chief of Defence Staff General NS Raja Subramani, Navy Chief Admiral Krishna Swaminathan leh Army Chief General Dheeraj Seth-te hnuaiah a vawi khat nan an thukhawm khawm a ni.
CDS Gen Subramani-a hi tun hnai khan dah thar a ni.
June 30 atanga Army chief hna chelhtu, Seth-a chuan Nilaini khan sipaite hi tihtunlaina chu nakin zel atanga inpeihna tur lungphum a nih tur thu a sawi.
February thla khan India chuan Operation Sindoor hnuaiah ram venhimnaa a sum hman chu 15% chuangin a tipung a, 2026–27 union budget-a atana a dah chu Rs. vaibelchhe nuai 7.85 a ni.
Hei hian ralthuam leh system thar hmanga sipaite theihna tihpunna tur sum ruahman Rs, vaibelchhe nuai 2.19 a huam a, chung zingah chuan fighter aircraft, transport aircraft, helicopter, indo lawng, tuihnuailawng, laipui, smart weapons, missile, rocket leh unmanned system hrang hrangte pawh a tel a ni.
Defence ministry-in sipaite theihna tihpun dan tur a tar lanah chuan AKASH TARANG hian Army formation-te chu anti-UAV venhimna tha tak a pe dawn a; MPATGM hian infantry-ten hmelmate laka hlauhawm awm thei an do theihna tur a tichak ang a. MRSAM system hian indo laiin van sang atanga hlauhawm awm thei hrang hrang lakah medium-range air defense a pe dawn a ni.
Ministry chuan, “V-SHORADS multi-spectral sensing hmanga siam hian Indian Army-ten beihna an do let leh lo dan theihna leh awmze nena an chet theihna a tipung dawn a, invenna tha tak hian tank-te inven theihna neih sa chu a tichangtlung ang a, an dam khawchhuah theihna a tipung ang a. Jet-based kamikaze drone-te hian electronic warfare capability tha zawk a pe ang a, tumpuite va bitum fut chat theihna leh anmahni dam khaw chhuah theihna nasa zawk a pe ang a, chutih rualin a man hi a la tlawm hle a ni,” a ti.
Navy tana sipai hardware pawmpui zingah hian multi-influence ground mine (MIGM), naval shipborne unmanned aerial system (NSUAS), leh electric propulsion system atana land-based testing facility (LBTF) din te a tel.
Defence ministry chuan, “MIGM hian hmelma chu zalen taka awm theihna a pe dawn lo va, sensor tha tak tak hmanga thuam NSUAS hian Indian Navy-te dinhmun hriatthiamna a tipung dawn a. LBTF hian Indian Nay-te thil neiha motor leh a kaihhnawih propulsion system-te testing requirement a tlin dawn a ni,” a ti.
Indian Air Force chuan fixed-wing-based high-altitude pseudo satellite (FW-HAPS) lei phalna an dawng ve bawk a. Air Force tan intelligence, surveillance & reconnaissance (ISR), telecommunication leh remote sensing mission te a pui dawn a, thil tam takah hmasawnna a thlen dawn tih ministry chuan a sawi.