Inmamawh tawn kan nih avangin boruak ralmuang siam kan zel a tul
Inmamawh tawn kan nih avangin
boruak ralmuang siam kan zel a tul
Assam nen kawng tinrenga inmamawh tawn kan nih avangin boruak ralmuang tak kan siam zel a tul tih chief minister Lalduhoma chuan a sawi.
Guwahati-a Assam Royal Global University-in an zirlai lut tharte lawmluhna – Deeksharamb chu Nilaini khan an hmang a. Hmanpuitu Mizoram chief minister chuan, tunhnaia Assam state-in tuilian nasa tak a tuar chu Mizoram mipuiin an tawrhpui a. Nunna chan, chin hriatloha awm mek leh in leh lo chan an lainat em em a, an chanchin an ngaihven reng tih a sawi.
Mizoram chu Assam state atanga indang a ni a, state inthenawm an nih angin thil tam takah an inmamawh tawn a, hmasawnna kawngah tum thuhmun neiin an kal a, mihring pawh an inkalpawh tam a. Assamese tam tak Mizoramah an cheng a, chutiang bawkin Mizo tam tak Assam-ah an khawsa mek a. Assam mi leh sa, Mizorama cheng Assam Culture Society of Mizoram chu 2024 May 11 khan Rongali Bihu Vanapa Hall-ah an buatsaih a, a telpui nghe nghe a, thlamuang taka awm turin a hrilh tih a sawi.
“Kawng tinrenga inmamawh tawn kan nih avangin boruak ralmuang tak kan siam zel hi a tul a. Assam chief minister nena kan inkawm tum pawhin kawng tinrenga boruak tha siam dun chu tha kan ti a ni,” a ti.
Zirlai naupangte chu hlawhtling taka university kal chhuak vek turin duhsakna a hlan a. Mizoram atanga he University-a lutte chu Zo nun zemawi chhawmnung chunga zirlai tha ber ber nih tum turin a chah.
University chu zirna hmun satliah a ni loa, mi puitling ni tura kawng hrang hranga inchherna hmun, culture hrang hrang intawhkhawmna, mihring inzahtawnna leh khawsakho thiamna zirna hmun a ni, tiin, “He university hian chu chu a ngaihlu tih ka hria a, convocation lo awm leh tura a thupui turah pawh ‘Mizoram’ tih chu a hmang dawn tih ka lo hria a. Zirna hmun tha a nih bakah hnam inpumkhatna leh mihring inunauna zirtirna tha tak a ni,” Lalduhoma hian a ti.
Assam Royal Global University hi kum 2017-a din a ni a, tunah hian academic programme 130, faculty 500 vel neiin zirlai naupang pawh 9000 chuang an nei a. Foreign student pawh ram 28 atangin mi 400 chuang an nei mek. Assam-a university tha ber pawla ngaih niin Dr AK Ansari chu chancellor a ni a, Prof Dr Alak Kumar Buragohain chu vice chancellor a ni.
Kumin Student Induction Programme hi ni 19 chhung awh turin an kalpui mek a, ram 28 atanga kalkhawm zirlai tharten univesity an hriatchian theihnan leh an zinga inpawhna tha a awm theihnan hun hi an hmang a ni.