Ruahtui tlak danin kum 5 chhung ngai awh tawh lo

Kum 2018 hma lam kum 15 chhunga Mizorama kum tin ruahtui tla millimetre sanghnih chung lam a nih \hin laiin, 2018 hnu lam kum nga chhung chu ruahtui tlak danin ngai a awh thei tawh lo va; kum tina ruahtui tla chu millimetre sanghnih hnuai lam vek a ni tawh.
Mizoramin ruahtui millimetre sanghnih chunglam a dawn hnuhnun ber chu 2017 kum kha niin 2712.30mm a dawng a, a kum leh chiah 2018 a\angin millimetre sanghnih a pha ta lo a. Kum 2018-a ruahtui tla chu 1958.50mm a ni a; 2019-ah 1812.74mm; 2020-ah 1932.50mm; 2021-ah 1551.60mm leh 2022-ah 1650.23mm a tla a ni.
Kum 2018 hma lam kum 15 kalta chhung khan kum khata ruahtui tlain 2000mm a kai lohna kum hnih chiah a awm a, chungte chu— 2008-ah 1892.80mm leh 2014-ah 1821.20mm te a ni a, a bak zawng kum 13 chhung kha chu millimetre sanghnih chung lam vek a ni.
Kum 20 (2003-2022) chhunga ruahtui tlak tam ber kum chu 2004 niin 3506.10mm a tla a; a tlak tlem ber kum chu 2021 kha niin 1551.60mm a tla a ni.
Hei hi Directorate of Economics & Statistics (DES)-in a tihchhuah Statistical Handbook 2022-ah tarlan a ni.
DES-in kum thum kalta 2020-2022 chhunga thla tina ruahtui tlak dan khaikhinna a tarlanah chuan, ruahtui tlak tam ber thla chu July, 2020 kha niin 439.40mm a tla a, Mizoram puma ruahtui tlak miah lo thla December 2020 leh February 2021 a awm bawk.
Nikum 2022 khan Siaha district-in ruahtui a dawng tam ber a, 2738.7mm a tla a, March leh November thlaah ruahtui a tla lo ve thung. Aizawl district chu pahnihna niin 2016.3mm tlain Mamit district chu pathumna a ni a, 1885.3mm a tla a. Ruahtui tlak tlemna ber chu Khawzawl district niin 779.5mm a tla a ni.
Nikum chhunga thla tina khaw awm dan tehnaah khaw lum ber thla chu April niin, ni tina khaw awm dan chawhrualin 27.90C a ni a, a vawh ber thla chu January niin temperature chu 13.10C a ni.