Rublev hmaah Djokovic?

Tennis a inelna ngaihhlut hlawh ber Wimbledon khelh chhunzawm zel a ni a. Pathianni zanah Russian star Andrey Rublev chuan hnehna changin quarter-final a lut. Rublev hi champion lai Novak Djokovic nen semi-final luh an inchuh a rinawm.
World No. 7 Rublev hian last 16-ah Alexander Bublik hmachhawnin, inkhel hautak takah harsa takin hnehna a chang thei hram a, Wimbledon-ah a vawi khat nan quarter-final a lut.
Rublev leh Bublik te hian set hmasa ber atangin khel hmuhnawm an lantir nghal a, an inhnehtawk hle. A serve a nat dun vangin game an la zung zung a, break an nei hleithei meuh lo. Set khatnaah hian tie-break khelh a ngai nghal dawn nia a lan laiin Rublev hian break pawimawh tak a neih chhawr tangkaiin set hma a la thei hram.
Harsa taka set a lak hnuin set hnihnaah Russian Rublev a khel tha zual sauh a, hma taka break a neih a chhawr tangkai a, game thum chiah hlohin set a la a, chak turin a dinhmun a tha tawh viau.
Set hnih a hloh zawn vangin Alexander Bublik a zam mai lova, tha zetin a khingpui a bei let. Set thumnaah break an neih theih loh ve ve vangin tie-break khelh zui a ngai a, tie-break-ah Bublik chungnung zawhah a tang a, set a la let. Set linaah pawh an inhnehtawk zui leh viau a tie-break hmang bawkin thelh an ngai leh a, tie-break-ah Bublik bawk a chungnung zui leh. Set hnih ve ve an lak vangin deciding set khet a ngai zui ta hial.
Deciding set tir lamah an inhnehtawk leh viau a, an serve a that dun em vangin game an la zung zung. Tie-break an khel leh mai a rinawm hman laiin Bublik a chesual a, uiawm takin a serve a hum zo lo. A serve a hum zawh loh hnuin a khingpui hi break let tum viau mah se a hlawhtling zo tawh lo va, inkhel hmuhnawm takah Andrey Rublev chuan 7-5, 6-3, 6-7(6), 6-7(5) 6-4 in hnehna a chang a, a vawi khatnan Wimbledon quarter-final a lut.
Rublev a chak hnu hian champion lai Novak Djokovic leh Hubert Hurkacz te an inhmachhawn zui ve leh a. Inkhel hmuhnawm takah Djokovic-a’n harsa takin set hnih a la hman a. Quarter-final lut tura set khat lak chiah a mamawh laiin match suspend a ni a, nizan khan an khelh hmabak an khel chhunzawm zel. Set hnih a lak tawh vangin Djokovic hi quarter-final lut ngei tura ngaih a ni.
Grand Slam-a vawi 24 champion tuma hma lam pan mek Djokovic hian service na zet mai Hubert Hurkacz hi a break hleithei bik lo. A khingpui break thei bik lo mah se hun pawimawh tie-break-ah erawh chungnung zawk a ni ve ve a. Tie-break hmangin set hnih a la zawn a, he thu buatsaih lai thleng hian 7-6 (8-6) 7-6 (8-6) in hma a hruai mek a, quarter-final a hnaih tawh hle.
Novak Djokovic leh Andey Rublev te hi vawi li an inhmachhawn tawh a, Djokovic vawi thum a chak tawh a, Rublev hi vawi khat chak zawkah a tang tawh bawk. An intum hnuhnun ber chu Australian Open 2023 kha a ni a. Hemi tum hian set hloh lovin Djokovic a chak.