Ruhro laihchhuah zirchiang

Tunhnaia Lunglei district khaw pakhata hlumbela dah ruhro chu mithiamten zirchian turin an la.
Kumin June 22 khan Aizawl atanga km.167-a hla Changpui khuaah, excavator-in lei a laihna lamah mihring ruhro laihchhuah a ni a. A laihna hmun neitu hi Lalrosiama a ni. He thu hi social media-a a darh hnuin Mizo Archaeological Society (MAS) leh ICFAI University Mizorama MA History department tangdun chuan June 24 khan a hmunah enfiahin an senghawi a. He ruhro hi mihring puitling pakhat ruhro, bel chhunga awm a ni.
He ruh hi nakin zela research la ti duhte tan leh Mizorama ami chengte history chhuina atana thil tangkai thei a nih avangin vawnghima kawltha turin June 27 khan ICFAI University Mizoramah dahthat tura hlan a ni.
Hun dangah hetiang ruhro laihchhuah a nih leh chuan, tun hnu zelah a rang lama Mizo Archeological Society hrilh thuai turin he pawl hruaitute chuan mipui an ngen a. Hetiang ruhro hi dimdawi taka vawnthat a pawimawh a, kutlawnga lo khawihin zir zui duh tan thil a tih pawi theih avangin, kutkawr thianghlim nen a nih loh phei chuan khawih bawrhbang lo thei tur ang bera ruahmanna siam nghal thuai thin tur leh fimkhur taka lo dahtha zel turin mipui an ngen. ‘A theih chuan, a hmuh chhuahna hmunah khawih sawn loa lo zuah hram turin kan ngen a ni,’ MAS hruaitute chuan an ti.