Ruihhlo awmna khua Tlangmawi

Khawzawl district-a Tlangmawi khua chu ruihhlo ti leh zuar awm lohna khuaah thlan a ni a, puan a nih theihna tura endik ngai leh tul dang pawh tih zawh a ni tawh.
District Narco Co-Ordination Centre (NCORD) Khawzawl chu an chairman, bawrhsap K Vanlalthiana kaihhruaiin Thawhtanni khan an thukhawm a. An district-a Drug Free Village-a thlan Tlangmawi khua chu endik ni tawhin a tul dangte zawh fel a ni tawh a, state level NCORD thutkhawma pharh theiha peihfel a ni. July thla hian Khawzawl Chhim Veng Presbyterian Kohhranah ruihhlo laka fihlim tura inzirtirna buatsaih tum a ni.
NCORD member convener, Khawzawl SP F Lalbiakzauva report danin, NCORD thutkhawm hnuhnung ber atang khan an district huamchhungah heroin gram 228 leh methamphetamine kg 1.972 man a ni a. Kumin kum chanve chhung hian Khawzawlah ruihhlo kaihhnawihah case 49 ziahluh a ni.
Khawzawl Anti-Tobacco Squad hmalakna report a ni a. Sawrkar office leh vantlang hmuna vaihlo zial zuk khapna chu tha taka kenkawh nise, dan bawhchhia chu section 4 of the Act Cigarettes and Other Tobacco Products Act 2003 (COTPA) hmangin Rs.200 chawitir tur an ni tih sawi a ni. Ruihhlo leh a kaihhnawih do bakah a bikin naupang leh thalaite zuk leh hmuam laka an fihlim theihnana hmalak dan tur sawiho a ni.