Ruihhlo bansan nunphung pangngaia kir hnenah CM Special Package kan pe – Chief minister

Ruihhlo bansan nunphung pangngaia
kir hnenah CM Special Package kan pe
– Chief minister
Hulhliap Short Stay Centre atanga chhuak ruihhlo bansan a, nunphung pangngaia kir mi engemawzat hnenah CM Special Package an pe tih chief minister Lalduhoma chuan a sawi.
Social Welfare, Women & Child Development department bultumin Bana Kaih Policy hnuaia progress partner-te hnenah CM Special Package pek an ni a, Accredited Drug Treatment Centre-te hnenah accreditation certificate leh grant -in-aid (GIA) pek chhuah a ni a. Hmanpuitu chief minister Lalduhoma chuan, thalai tam tak ruihhlo sala an tan mek avangin chhungkua leh khawtlang a nghawng nasa a, nun kawng pangngaia an kir leh theihna turin kawng hrang hrangin hma an la a; kohhran, tlawmngai pawl leh rinna behchhana Rehabilitation Centre /Home hrang hrangte an thawkrimin an tangkaipui hle tih a sawi.
An hun hman chhan ber chu, humsual dai leh ruihhlo ngaite chawmdawl hna thawktu Center-te inenkawlna tur pek leh thawk chhunzawm zel thei turte thlanchhuah an ni tih sawiin, “Heng hna hi rawngbawlna anga ngaia thawh chi a nih avangin mi zawng zawng thawh theih pawh niin a lang lo a. Kohhran leh Pathian kohna dawngten tha takin an kalpui a. An ni nen hian sawrkar chuan thawhho tha kan ti a, ruahmanna pawh kan siam a ni,” a ti.
Ruihhlo bansan a, nunphung pangngaia kir mi engemawzat hnenah CM Special Package an pe a. Hei hi thil chhinchhiahtlak tak a ni tih chief minister hian sawiin, “A dawngtute hmel ka en a, Hulhhliapa in awm lai nena khaikhin chuan in hmel hmuh a nuam ta hle. In taksain nasa takin hma a sawn tih a lang. Bul in tanna tur sum leh pai kan pek che u hi beitham hle mah se, tha taka hmanga eizawnna lama hma sawnpui tum tlat ula kan duh. Vawiin amite hi a bultantute in ni a, hna in thawh that chuan nangmahni anga nunkawng dik rawn zawhtute tan entawn tur tha tak in ni dawn a ni,” a ti.
Ruihhlo zawrh leh thehdarh do kawngah sawrkarin nasa takin hma a la a. Mizorama security agency zawng zawng nen tanghoin operation an kalpui a. Ruihhlo an man nasat avangin a vang tial tial a, a man pawh a to sawt hle tih Lalduhoma hian a sawi a. Ruihhlo do kawngah tlawmngai pawlte an tangkai em em tih a sawi a ni.
SW,WCD minister Lalrinpuii pawhin, Mizoram sawrkar hnuaiah ruihhlo ngai, nun kawng dik zawha hawikirte hmakhua a eng tih a sawi a. An banah sawrkarin kaih a inhuam tih sawiin, chief minister-in an bana kaih ngaite chu an kai dawn tih a lo sawi tawh angin, ruihhlo ngai dam leh an bana kaih ngai chu a takin CM ngeiin a kai ta tih a sawi. Tun tuma progress partner mi 33 chu an thil dawnte an dawn chhan ang taka hmang tur leh midang tan malsawmna ni turin a chah.