Ruihhlo do dan enfiah tul

Tunhma kum sawm hma lama ‘ruihhlo a hluar’ tih leh, tun dinhmuna ‘ruihhlo a hluar’ tih chu a inthlau ta hle.
Kum sawm hma lama kum khat chhunga ruihhlo man tlingkhawm zat leh, tun dinhmuna ni hnih khat lek chhunga ruihhlo man chu a inzat ta nawk nawk mai.
Heti taka ruihhlo a hluar tak avang hian a zuartute pawh an huangtau sawt hle a, ruihhlo ngaite pawh ualau takin khawlai khawi lai step-ah emaw an inchiu ngawng ngawng ngam tawh a. Hetiang thil hi zirlai, naupang thanglaiten khawlaia an hmuh reng chuan, thil tha lo zawk a hring chhuak zel dawn tih a lang reng mai.
Ruihhlo dona atana tlawmngai pawl hrang hrangte leh sorkar department te hman tur cheng nuai 300 ruahman a nih dan tun hnai lawkah tarlan niin, hei hi Core Committee on Ruihhlo Do hnenah sawrkar chuan a hlan tawh niawm tak a ni a. He sum hman tangkai a nih dan tur hi a chipchiarin mipui lam chuan hre lo mah ila, sawt taka hman a nih a rinawm a. Chutih laiin, a pawl leh department hmalakna ngawr ngawr chauh ni lovin, mipui nena tanrual theihna tur hawi zawnga ruihhlo do programme hi duan a pawimawh dawn tih erawh a lang chiang mai awm e.
Kha leh chen kha ruihhlo dona kalpui a lo ni tawh a, engmah awmzia a nei lo tih chu tuna ruihhlo a lo hluar tak tual tual atang hian a lang a. Ruihhlo kan do dan system hi enfiah a tul tawh hle tih a lang.
Ruihhlo donaah hian supply reduction lamah kan insawrbing deuh ber thin niin a lang a, demand reduction lamah pawh hma chu kan la alawm kan ti ve bawk tak na a, kan la urhsun tehchiam lo niin a lang. Supply a awm chhan ber chu demand a awm vang a ni a, a demand-tu turte hi kan lo tlan khalh a pawimawh tih a lang chiang hle.
Tuna naupang thanglai zingah hian ruihhlo khawih an pung chho zel tih survey report-ah a lo lang a. Hei hian drug demand reduction lama tan lak a ngaih nasatzia a lantir chiang thawkhat viau tawh. Hemi kawngah hian, sum leh pai a ni ber lo va, mipui nena tanrualna a pawimawh ber dawn a ni.