Gauhati High Court k-75 tlin lawm Court case chinfel ran a tul – Larsap

Gauhati High Court k-75 tlin lawm
Court case chinfel ran a tul – Larsap
April 5 kha Gauhati High Court kum 75 tlin, Platinum Jubilee a ni a. Gauhati High Court Aizawl Bench leh Mizoram Legal Services Authority chuan a lawmna siamin, seminar – “Challenges and the way forward for the judiciary in Mizoram” tih thupuia hmangin an buatsaih.
He hun hmanpuitu larsap Dr Hari Babu Kambhampati chuan Mizote chu remna leh muanna ngaina mi an nih thu leh intihbuaina case pawh tam tak a awm thin lo tih a hriat thin avangin lawmawm a tih thu a sawi. India rama court thutlukna leh judiciary-ah te rinna kan nghat a, rorelna dik chang turin beiseina eng kan nei chu kan vanneihna a nih rualin, India ram judicial system-a thil siamthat ngai chu, kan beisei aia court thutlukna siamchhuah a muang thin chu a ni tih a sawi.
“Rorelna dik pek tlai chu rorelna dik pek duh loh nen anga tehkhin a ni a. Hei hi kan zavai rilruah awm reng se, judicial community-te hian a theih anga rangin court-a case lut te chinfel thuai a nih theihna’n theihtawp chhuah turin ka ngen a ni,” a ti.
Mizorama judiciary tihhmasawnna atana hmalakna pawimawh tak, eCourts Mission Mode Project kalpui mek a ni chu thil lawmawm tak a ni tih larsap hian a sawi a. Hei hian tunlai information & communication technology huanga hmasawnna nasa tak thleng mek hmang tangkai turin court a buatsaih a. Cyber crime dona kawnga hma lak a ti chak sawt dawn, tiin a sawi a ni.
Gauhati High Court judge, Justice Nelson Sailo chuan Mizoram judiciary-ah hmasawnna nasa tak hmuh tur a awm tawh tih a sawi a. Judiciary-in hma a sawnna tura thil pawimawh hmasa chu infrastructure a ni, tiin, court infrastructure siam kawngah Mizoram sawrkarin tha taka a thlawp avangin lawmawm a tih thu a sawi a ni.
Tunah hian Mizoramah kum telin advocate an pung zel a, kumtin lawyer 50 velin BAR an zawm deuh ziah tih Justice Nelson Sailo hian a sawi. “Court huangah ringawt danhremite awm a hun tawh loa, ram rorelna leh ram dana mipui aiawha dan siamna huang – legislature lamah pawh danhremite chuan tel ve an tum tur a ni. Danhremite chu mipui tana dan tha leh hamthatna siam kawngah a zira zir chhuak an nih angin, an tel tam deuh deuh a ngai,” a ti.
1948 April 5 khan tuna Gauhati High Court hi High Court of Assam tia din a ni a. Sitting hmasa lam Shillong-a neih thin a nih hnuin 1948 August 14 khan Gauhati-ah sawn a ni. Kum 1963-a Nagaland state a pian khan High Court of Assam & Nagaland tih a ni a. A hnu deuhah North Eastern Area (Reorganization) Act 1971 hnuaiah state 5 -Assam, Nagaland, Manipur, Meghalaya leh Tripura bakah UT 2 – Arunachal Pradesh leh Mizoram intawm turin Gauhati High Court tih a ni.
1987 February 20 atangin state 7 – Assam, Nagaland, Manipur, Meghalaya ,Tripura, Arunachal Pradesh leh Mizoram ten an intawm ta a. NE state dangten anmahni puala High Court an neih deuh vek tak hnu ah tunah hian Assam, Mizoram leh Arunachal Pradesh ten an intawm mek. Guwahati-ah principal seats awmin Aizawl leh Itanagar-ah Bench a awm a ni. Aizawl Bench Gauhati High Court hi 1990 July 5 khan din a ni a. Kum 2008-a judiciary an indan atang khan Aizawl Bench Gauhati High Court chuan Mizorama court zawng zawng leh tribunal kaihhruai hna a thawk tan a ni.
Tunah hian Mizoramah judicial district pathum – Aizawl District (Aizawl, Kolasib, Mamit leh Saitual), Lunglei District ( Lunglei, Lawngtlai, Siaha leh Hnahthial) leh Champhai District (Champhai leh Khawzawl) a awm a ni.