Ruihhlo tawlhrukah kumtling lo leh hmeichhia inhnamhnawih tam

Ruihhlo tawlhrukah kumtling lo
leh hmeichhia inhnamhnawih tam
Tunhnaia ruihhlo tawlhruknaah naupang kumtling lo leh hmeichhia inhnamhnawih an tam chu ngaihmawh tham a ni tih Mizoram DGP Devesh Chandra Srivastva chuan a sawi.
Nilaini khan State Level Narco Coordination Centre (NCORD) Committee chu an chairman, chief secretary Renu Sharma kaihhruaiin a tum 4-na atan an thukhawm a. Thutkhawm hi an convener, Anti Narcotics Task Force (ANTF) chairman ni bawk Veenu Bansal, IGP (Intel) huaihawt a ni.
DGP chuan tunhnaia ruihhlo tawlhruk leh man chungchangah naupang kumtling lo leh hmeichhia inhnamhnawih an tam thu leh he thil hi ngaimawh tham a nih thu a sawi a. Drug Law Enforcement Agencies (DLEAs) thawhhona tha a pawimawh tih a sawi.
Chief secretary chuan DLEAs tihchak a pawimawh thu leh ruihhlo hlauhawm thu leh a that loh zia thalaite hnena chah ngun a pawimawh tih a sawi a. Ruihhlo dona kawnga mawhphurhna latute tang lehzual tur leh rawtna tha nei tura a duh thu a sawi a ni.
Narcotics Control Bureau, Mizoram Police/ANTF, Excise & Narcotics Department, Social Welfare & Tribal Affairs Department leh Assam Rifles atangin NCORD thutkhawm hnuhnung atanga an hmalaknate report an pe a. Department hrang hrang atangin a hmunah leh online-in NCB hotute, Enforcement Directorate, District DCs leh District SP atangin member 28 an tel.