Ruihhlo vangin mi 16-in nunna chan tawh

Ruihhlovin kawng hrang hrangin Mizoram a tibuai a, kuminah chhinchhiah chinah mi 16-in ruihhlo vangin nunna an chan tawh.
Mizoram Excise & Narcotics (MEN) department-in an chhinchhiah danin, April ni 19 thleng khan Mizoramah mi 16-in ruihhlo vangin nunna an chan tawh a, mipa 14 leh hmeichhia pahnih an ni.
Mi 16-te zinga pariatte chu heroin vanga nunna chan an ni a, mi dang pariatte chu heroin leh damdawi ruihhlo dang khawih pawlh an ni. Mi 16-te vanduainaah hian heroin a tel vek.
An chhinchhiah danin, ruihhlo vanga nunna chante hi kum 19 leh kum 44 inkar an ni.
MEN department hian 1984 atangin ruihhlo vanga nunna chan zat hi an chhinchhiah a, 1984 atanga kumin April ni 29 thlengin mi 1895-in nunna an chan tawh.
Kum 20 leh thla li vel chhunga nunna chante hi mipa 1667 leh hmeichhia 228 an ni a, kum 14 leh kum 58 inkar an ni tiin an chhinchhiah.
Heroin vanga nunna chan mi 280 an awm a, spasmo proxyvon/parvon spas vanga nunna chan 1161 an awm. Mi dang 454-te chu damdawi ruihhlo hrang hrang khawih pawlh an ni.
2014 vel thleng kha spasmo proxyvon/parvon spas hi ruihhloah nunna la nasa bertu a ni a, hetiang damdawi hi a chhuak tawh lo. 2016-ah spasmo proxyvon/parvon spas vanga nunna chan mi pahnih an awm a, chumi hnuah chuan he damdawi ruihhlo vanga nunna chan an awm tawh lo. 2016 hnu lamah chuan heroin hi pawikhawihtu ber a ni.