Rune leh Ruud an chak

French Open 2023 khelh mekah mipa lamah champion tura rinkai zinga mi Holger Rune leh Casper Ruud ten third round paltlangin fourth rond an lut. Denmark rawlthar Rune chuan French Open-a champion chu an tum lian leh a thlakhlelh em em a nih thu a sawi.
Danish sixth seed Rune hian third round-ah Argentina player Genaro Alberto Olivieri a hmachhawn a, Argentine lakah awlsam takin hnehna a chang. Rune hian set khatnaah break pawimawh tak a neih chhawr tangkaiin set khat na a la a, set khatnaah hi chuan a khingpui nen hian an inhneh-tawk pangngai viau. Set hnihna ah erawh a chungnung ta viau thung a, game khat chiah hlohin set a la. Set hmasa pahnih a lak zawn hnuin a khel tha chhunzawm a, set thumnaah game thum chiah hlohin set a la zui leh a. Alberto Olivieri lakah hian 6-4 6-1 leh 6-3 a hnehna changin forth round a lut a. 4th Eound-ah Taylor Fritz vawtlatu Francisco Cerundolo a hmachhawn zui leh ang.
Champion tura rinkai zinga mi Rune hmaa ding tur Francisco Cerundolo hian 9th seed Taylor Fritz lakah set a hloh hmasa zet hnuin tha zetin a thochhuak a, 3-6 6-3 6-4 7-5 a chakin fourth round a inhlangkai ta a ni.
Inrinni zana inkhel dangah kum 2022 finalist Casper Ruud chuan a khingpui Zhang Zhizhen lakah harsatna lian tawk lovin hnehna a chang. Grand Slam final pahniha vanduai zawn tawh Ruud hian Chines Zhang Zhizhen lakah set a hloh hmasa zet nang a, awlsam taka set thum la zawnin hnehna paiwmawh a chang let a. A khingpui hi 4-6, 6-4, 6-1, 6-4 in a hneh.
Casper Ruud leh Holger Rune te hi vawikhat an chak leh ve ve a nih chuan quarter-final-ah an inhmachhawn thei dawn a. Quarter-final-ah an inhmachhawn a nih chuan inkhel hmuhnawm tak a nih ngei a rinawm.
Inrinni zana inkhel dang, inkhel hmuhnawm takah Germany Alexander Zcerev chuan a khingpui Frances Tiafoe chu 3-6 7-6 (7-3) 6-1 7-6 (7-5) in a paltlang a, fourth round a lut ve bawk.