Russia-in Kyiv-a chenna in a kahnaah mi pathum thi

Russia-in Kyiv-a chenna in a kahnaah mi pathum thi
Russian-ten boruak atanga Inrinni zana Ukrainian khawpui, Kyiv an beihnaah mi pathum an thi a, mi 32 velin hliam an tuar bawk niin mayor-in a sawi.
In chhawng sang pahnih a fuh niin Vitali Klitschko-a chuan a sawi a, hliam tuar zingah naupang paruk an tel bawk tih Telegram-ah a tar lang.
Hetih lai hian Russian air defence chuan Moscow pana thlawk drone kah thlak an ni tih Mayor Sergei Sobyanin-a’n a sawi ve bawk.
Russian-te hian thlasik lo thleng mekah civil mi leh an mamawh hmunte an bei thar nasa zual a, Ukrainian thuneitute chuan kar khat liam ta chhungin drone 1,200 dawna beih an ni tih an sawi.
Kyiv thuneitute chuan khawpui hmarthlang lam, Desnianskyi district-a chhawng kuaa sang chenna in drone-in a fuhnaah mi pathum thiin mi 24-in hliam an tuar tih an sawi.
Kyiv hmun dangah chenna in pathum vel a chhe bawk a. Naupang pahnih telin mi pasarih damdawi ina dah ngaiin an awm tih an sawi.
Russia hian kum 2022 atang khan Ukraine hi rûn tanin tunah hian an ram hmun ngaa thena hmun khat vel an thununsak tawh.
Indona hi nasa taka kal mek zelin Ukraine hian Russia-in indonaa an hman tangkai hmun, sipai mamawh siam chhuahna, tuialhthei hmun leh an eibar dapna atana pawimawhte a tihchhiatsak nasa.
Ukrainian President Volodymyr Zelensky-a chuan an thawhpui ramte chu hmun hla kap phak thei ralthuam pe turin a ngen nasa hle a. Tun hnaia White House a tlawh leh EU summit-a a telnaah erawh kutruakin a haw thung.
Indona hi tihtawp tumin hmalakna pawh a awm nasa a, a bikin US President Donald Trump-a chuan ram hruaitu pahnihte hi vawi eng emaw zat a dawr tawh a; mahse, inkahhai puan emaw pawh tihtluk a ni thei lo.