Russia-in Ukraine-a bus a beihnaah mi 15 thi

Ukraine khawchhak lama Russian drone-in company shuttle bus a fuhah mi 15 an thi niin region thuneituin a sawi.
Dnipropetrovsk region-a Pathiannia beihna thlengah hian mi pasarihin hliam an tuar bawk niin an region-a sipai inawmnaa hotu, Oleksandr Ganzha-a’n Telegram-ah a tar lang.
Energy company DTEK chuan lirthei hian thil laih chhuahnaa thawkte a phur tih sawiin beihna an tawh chu tum reng vanga tih niin a sawi bawk.
Hetih lai hian tual chhung thuneitute chuan Russian-ten Inrinni zan leh Pathianni zing lama an beihnaah mi pathum vel thiin mi dang pakuain hliam an tuar bawk niin an sawi a. Hliam zingah hian hmeichhe pahnih, a bul lawk nau neihna amdawi ina nau neia awm pawh an tel niin an sawi.
Ukraine-a mi mal energy firm lian ber chuan an miner-te hi an hna thawh hun bi a zawh hnua an haw chu beih an ni tih an sawi a, mi 15 an thi niin a sawi bawk.
A hma zan chiaha Dnipro lailia beihnaah mipa leh hmeichhia an thi niin Ganzha chuan a hmain a lo sawi tawh bawk.
Regional head Ivan Fedorov-a chuan Zaporizhzhia-a nau neihna damdawi in beihnaah mi parukin hliam an tuar niin a sawi a, Telegram-a a tar lanah ‘mi nunna la tura inbeihna a ni tih finfiahna chiang tak’ niin a sawi.
Hliam tuarte hi an zavaiin a tul anga enkawl an ni tih a sawi a. Damdawi in chhung atanga tukverha mei leh a khu inphuh chhuak lai thlalakte pawh a dah chhuak bawk.
Russia hian January thla khan nasa takin Ukraine-a power grid a bei a, hei vang hian thlasik khaw vawt vin tak, kartawpah phei kha chuan hmun thenkhata -20°C lai a nih laiin intihlumna leh electricity supply an hmu lo nasa hle.
US President Donald Trump-a chuan Ningani khan Russian President Vladimir Putin-a chuan khaw vawh zual chhung, chawlhkar khat vel Ukrainian khawpui liante beih tawh chawlhsan a inhuam thu a hrilh niin a sawi a. Kremlin chuan hei hi Pathianni thleng kha niin a sawi.
Hetih lai hian Ukrainian President Volodymyr Zelensky-a chuan kum li dawn an indo tawh hnuah ram pathum, Russia leh US te nen inbiak thawh hnihna chu Nilainiah neih leh a ni dawn tih a sawi a, hei hi Pathiannia neih tura tih kha a ni zawk.
Sawn hlat chhan hi a sawi lo va, Russian, Ukrainian leh US thuneitute inbiak hi Abu Dhabi-ah neih a ni leh dawn a ni.