Russia leh Nato boruakin chhiat lam pan zel

Russia a Kommersant newspaper chuan hadline ah “Vladimir Putin an red line a rin” tih a hmang a. “khawthlang ram ten rin an pel dawn em? Pel ta e, Russia in engtin nge a chhan let ang?”
St Petersburg ah President Putin chuan chiang taka Khawthlang ramte vauin: Russian territory beih nan in long-range missile te Ukraine in a hman remti duh su, a ti.
Moscow chuan long-range missile hman remtihna chu Ukraine indonaa Nato ram te ‘tel ve na’ angah a ngai hmak dawn a ti bawk.
“Indo kalpui mek hmelhmang a thlak danglam vek ang a, buaina hmelhmang pawh a thlak danglam daih ang” tiin Kremlin leader chuan a sawi bawk a.
“Chumi awmzia chu Nato ram, USA leh European states te chu Russia nen an inbei tihna a ni ang” a ti bawk.
Putin chuan Russia a missile kap lut tur chuan Ukraine chuan Western satellite data a hman a ngai dawn a, Nato member state servicemen te puihna tel lovin Ukraine in engmah tihtheih a nei lo a ti bawk.
Russia chuan a hma pawhin red line a rin tawh a, a mit hmuhlai ngeiin a red line rin te chu paltlang a nih pawh a hmu bawk.
24 February 2022 a Ukraine runa ‘special military operation’ tia sawia a kalpui tum khan President Putin chuan vauna chhakchhuak nghalin ‘pawn lam mite an inhnamhnawih kan remti dawn lo’ a ti a.
“Kan kawng dala kan ram leh kan mipuite tana harsatna siam tum an awm a nih chuan Russia in a chhanglet nghal ang” tiin khatihlai khan Kremlin leader chuan a sawi a. “A sawhkhawk chu na tak a ni dawna history in a la tawn ngai hauh loh a ni ang” a ti zui bawk.
Putin vauna chu Khawthlang ram te chuan nuclear ralthuam hmana invauna angah an ngai a, mahse an namnul ngam hmak thung. Khami hnu atang khan Khawthlang ram te chuan Ukraine hnenah tanks, advanced missile systems mai bakah tun hnaiah F-16 American fighter jets te an pe tawh a ni.
Kuminah pawh Russia chuan Ukraine chuan American siam long-range ATACMS missile te chu Crimea, Russia in Ukrainian peninsula a chhuhsak beih nan a hmang tiin a lo sawi tawh bawk.
Tun hnai kum hnih chhungin Russian officials leh state media te chuan tum tam tak chu Khawthlang ram te chu ‘Russia bei’ leh Russia laka ‘indona kalpuiah’ an lo puh tawh bawk a. A nihna tak zawkah chuan Russia chu Ukraine runtu a ni zawk.
Tuna President Putin thusawi chuan chiang takin Russian territory chhung tia khawvelin a pawm te Western missile system hmanga beih a nih chuan indona chuan bungthar hlauhawm a kai ngei dawn a tihna anga ngaih a ni a.
Engtiangin nge Moscow in a chhanlet ang tih erawh a sawi thui duh lo thung a. “Kan tana thil hlauhawm siam azir ang zelin chhanletna kan siam ang” tih chu Vladimir Putin sawi duh dan tawk a ni rih a.
Zirtawpni khan Russia chuan British diplomats paruk te accreditation chu chhuhsakin Russia security atana pawi thei zawnga chetla tiin a puh a ni.
June thla daih tawh khan Putin chuan khawthlang ram ralthuam hmanga beih a tawh thuta chhanlet dan tur niawm a lo sawi tawh thung a.
International news agencies head te nena meeting an neihnaah, Europe ram tena ralthuam an pekte hmang Ukraine in Russian territory a beihin engtin nge a chhan let ang? tih zawhna an zawt a.
“A hmasa berah chuan kan air defence system kan siamtha hmasa ang a. An missile te kan tihchhiatsak ang” tiin President Putin chuan a chhang a.
“Pahnihnaah chuan mi tuemaw in ralthuam hlauhawm supply a kan territory te beihna tur leh harsatna min siamsak tur te a pe a nih chuan eng vangin nge khawvel hmun dang leh sensitive tak tak ah te Russia laka an tih ang ti ve tura ralthuam te kan pek loh bik lem ang le?” tiin a chhang bawk.
Chumi awmzia ber chu Russia chuan Khawthlang ram te do leh hmelma te ram pawn lama western target te beihna turin ralthuam a pe ve mai dawn a ni a tihna anga ngaih a ni.
Tun thlatir lam khan Russia deputy foreign minister Sergey Ryabkov pawhin Russia chuan a nuclear doctrine a ennawn dawn tiin a lo sawi tawh bawk a, chumi awmzia chu Russia in a nuclear ralthuam te hman a nih theih nana thu dehkilh a siam te chu a tul angin a her danglam dawn a tihna a ni a.
Nuclear doctrine ennawn a ngaihna chhan ber pawh Khawthlang ram tena Ukraine indona kal mekah Russia tana harsatna an siamsak vang a ni tiin a sawi bawk.
Hetihlai hian Sir Keir Starmer chuan President Biden be turin Washington a thleng tawh a. Ram pahnih hruaitute chuan Ukraine chungchang leh Ukraine hnena long-range missiles pek a nih tur leh tur loh an sawi dun dawn nia sawi a ni a.
“Russia chu he buaina tantu a ni a, Russia in dan kalhin Ukraine a run a ni” tiin Sir Keir chuan Washington pan hmain a sawi a. “A duh chuan Russia in he indona hi a titawp thei” a ti bawk.
Western leaders te chuan bengsika ngaihtuah tur an neih chu buaina chu nasa zawka a punlun an remti dawn nge, Ukraine in western missiles te a hman remtihna an pe dawn tih a ni tia sawi a ni bawk.