Russia missile leh drone vangin mi 10 thi – Ukraine

Russia missile leh drone vangin mi 10 thi – Ukraine
Ukrainian thuneitute chuan Russia-in drone leh missile hmanga an beihnaah ni khat chhungin mi 10 an thi a, mi 76 chuangin hliam an tuar niin an sawi.
Moscow-in drone leh missile hmanga Ukrainian khawpuite a beih avangin ram chhung hmun panga-a thuneitute chuan thihna an thlen thu an sawi.
Hetihlai hian Ukrainian President Volodymyr Zelensky-a chuan Russian lawng chawlhhmun pahnih an beihnaah Russian tuialhthei phur pathum, cruise-missile phur indo lawng leh patrol boat an kap niin a sawi.
Lawng chhia chungchang hi chiang taka sawi a la ni lo va; mahse, Zelensky-a chuan tuialhthei phur lawngte hi kum 2022-a Moscow-in an ram an beih avanga khawthlang ramten hrekna a siamte pumpelh nan Russian ‘shadow fleet’ an tiha tel an nih thu a sawi.
Ukrainian air force-te chuan zan khat chhungin Russia-in drone 269-in a kap niin an sawi a, heng zinga 249 chu an lo dang thei niin an insawi.
Drone hian hmun 19 leh ballistic missile pakhatin hmun 15 a fuh thu an sawi a, drone pakhat keh darh tlain chhiatna a thlen pawh a nemnghet bawk.
Ukrainian thuneitute chuan Kherson region-a thil thleng hrang hrangah mi pathum an thi tih an sawi a, Odesa, Donetsk leh Zaporizhzhia region-ah mi pahnih leh Sumy region-ah mi pakhat an thi bawk.
Russian sipaite pawhin Ukraine-in drone 334 velin an ram an kap niin an sawi a, hmarthlanga Leningrad region chu nasa takin an bei niin an sawi.
Leningrad region leh hmun danga tuialhthei thawn chhuahna hmunte chu tun hnai khan Ukraine hian hlawhtling takin a lo bei tawh bawk a, an thawn chhuah tur dollar tluklehdingawn tam tak man a titawp niin Kyiv chuan a sawi.
Pathianni khan Zelensky-a chuan Finland bula Baltic Sea-a Primorsk terminal hmarthlang lama hmunhma nasa taka a chhiat thu a sawi a, tuialhthei phur lawng leh patrol boat an kap bawk tih a sawi.
Lawng dang an kah chu Karakurt class corvette, Kalibr cruise missile phur thei tura siam a nih thu a sawi bawk.
Ukrainian hruaitu hian a hmain tuialhthei phur pahnih dang chu Ukrainian drone-ten Black Sea lawng chawlh, Novorossiysk-ah an kap tih a lo sawi tawh bawk.
“Heng lawngte hi tuialhthei phurh nan an hmang nasa a. Tunah chuan an ni tawh dawn lo,” tiin Telegram-ah a tar lang a. He a thu dahnaah hian black-and-white video footage awm telin naval drone-in lawng pakhat a hnaih lai a ni tih a lang.
Russian thuneitute chuan beihna an tawnte hi an sawi nep zel a; mahse, Kremlin hian Ukrainian drone-ten an ram chhung thuk tak an thleng tawh chu an ngaihven hle tho bawk.
Nilaini khan Kremlin chuan kum tin an neih thin, Indopui II-naa Nazi Germany hnehna ni, May 9-a Victory Day an hman turah Ukraine atanga ‘firfiak hlauhawm’ a awm theih avangin an tih dan thin aia tlem sipai an inlan dawn tih an lo puang tawh.
Ukraine hian tun hnaiah Russia ram chhung thuk takah drone an luhtir nasa hle a, Kyiv chuan sipai an tum niin a sawi a, Moscow chu Ukraine-a civil mite beiah a puh bawk.