Russia Wagner mercenary te chu Sudan a commercial leh military lam thil hrang hranga inzawmna neiah puh an ni a, mahse, Wagner te thung chuan Sudan ram buainaah engmah inhnamhnawihna an nei lo an ti ve thung.
Wagner dintu Yevgeny Prighozin chu Russia President Vladimir Putin nena inzawmna thuk tak neia puh chuan ‘Wagner PMC (private military company) pakhattemah kum hnih chhungin Sudan ah inhnamhnawihna nei an awm lo’ tiin a sawi.
Mahse Russian mercenary te chu Sudan ram chhungah an awm mek ngei tih finfiah a ni thung a. A hma pawhin Wagner te sulhnu a awm ngei tih hriatfiah a ni bawk a, Prigozhin leh a hote chetlakna ram te chu US leh EU te chuan an hrek zui tlangpui bawk.
-- Advertisement --
Gold-mining deals
Kum 2017 khan khatih laia Sudan President Omar al-Bashir chuan Moscow tlawhin Russia sorkar nen inremna thahnem tak an ziak a.
Chung zinga chuan Russia chuan Red Sea a Port Sudan-ah naval base a din anga tih te bakah Russian gold mining compnay M Invest te leh Sudanese Ministry of Minerals te chuan inremna an ziak bawk a.
US Treausry chuan M Invest le an subsidiary group Meroe Gold te chu Sudan a Wagner Group te hmatawng tiin an sawi a, Sudan hi Africa a gold tharchhuaktu lian ber pathumna a ni bawk.
“Yevgeniy Prigozhin leh a netwrok te chuan Sudan natural resources te chu mimal hamthat bakah khawvel hmun dang danga an thiltihtheihna tihzauh nan an hmang” tiin khatih laia US Treasury Secretary Steven Mnuchin chuan kum 2020 khan a lo sawi daih tawh a.
M Invest leh Meroe te hi US chuan a hrek zui nghal nghe nghe a. A hnuah CNN tena investigtion an neihah Sudan gold te chu Central African Republic ah phurhchhuah niin helai hmun hi Wagner group te chetlakna nasatna niin heta gold thawnchuah te hi Sudanese official trade data-ah chhinchhiah a ni lo bawk.
Hei bakah hian gold dang thahnem tak te chu military airport netwrok hmangin phurhchhuah a ni tiin nikum khan Daily Telegraph te chuan an tarlang bawk.
Wagner tena Sudan-a thil dang an tih?
Kum 2017 atang khan Russia leh international source dangte chuan Sudan ram chhunga Russian mercenaries te awmna hmun nia ngaih te thlalak tihchhuahna an nei a.
Heng hmunte hi Sudanese sipaite training an pekna hmun te, lungawilote hmehmih an nih theih nana security forces te training an pekna hmunte a ni tia sawi a ni.
Kum 2021 khan Wagner nena inzawmna nei Telegram channel chuan thlalak pakhat Wagner commander ni ngeia ngaihin Sudanese sipai te hnena memorabilia a pe lai tihchhuah a ni bawk a.
Chu mai ni lovin he channel bawk hian July 2022 khan video pahat Wagner mercenary tena Sudanese sipaite parachute-landing exercise an zirtir lai tihchhuah a ni bawk.
Russian mercenary zinga tela ‘freelancer’ tia insawi chuan August atanga October 2021 inkar chhunga Sudan ram chhunga a chetvel dan video hmanga tihchhuahna a nei bawk a. Kum 2020 khan Wagner propaganda action film chu tihchhuah a ni bawk.
Wagner te thiltih theih dan?
US Treausry chuan Wagner Group te hian authoritarian regime te tan paramilitary operation neih sak thinin an natural resources te a hui thin, tiin a sawi.
“Kum 2018 tir lam kha chuan Sudanese military forces te training pe Wagner mi leh sa 100 vel an awm a, tunah chuan an inzawmna nghet zel nen an pung nasa tawh” tiin Dr Joana de Deus Pereira, UK-based Royal United Services Institute chuan a sawi.
Sudanese media-te chuan Wagner sipaite hi an ramah 500 vel an awm tawh niin an sawi a, south-west lama Um Dafuq hnaihah Central African Republic (CAR) ramri bulah an inbun deuh ber tiin an sawi.
Sudan Tribune chuan President Bashir an kum 2019 a amah duhlohna nasa tak lantir khum a nih khan ‘Russian fighters’ te hi anti-government protesters te thlithlai turin Sudanese intelligence leh security services te nen an che ho tiin a sawi a, hei erawh Sudanese thuneitute chuan an hnawl thung.
Rinawmna sawn
Wagner Group te hian Sudan President Bashir an thuneihna a chan zui zel theih nan khan a hranin media campaign an nei hial tiin Dr Samuel Ramani, Russia activitites in Africa tih lehkhabu ziaktu chuan a sawi a.
“Prigozhin chuan lungawilote chu pro-Israel leh anti-Islamic anga puh turin a ti” tiin a sawi bawk. Chu chuan presient security forces-ah ngaihdan inang lo siamin chumi hnuah Wagner te chuan Bashir nawr liamtu General Abdel Fattah al-Burhan chu an thlawpsan leh daih tih a ni bawk.
“Moscow-a Foreign Ministry chuan sorkar paihthlak chu a duh lo hle chungin Prigozhin leh Wagner Group te chuan al-Burhan an thuneihna a chang chu an lawm zawk” tiin Dr Ramani chuan a sawi bawk a.
Dr Ramani chuan kum 2021 leh 2022 khan Wagner Group te chuan Rapid Support Forces (RSF) tun Sudan regular army te Gen Burhan kaihhruai te nena inbei mek te chu an thlawp nasa zual tiin a sawi a.
Prigozhin a duh ber chu tun hnai lawka RSF leader Mohamed Hamdan Dagalo, Hemedti tia hriat larin gold khur a thunun atanga gold lakchhuah a ni tih a ni bawk. Nikum khan Kemedti chuan Moscow tlawh zuiin khatah khan Sudan leh Russia inlaichinna chu tihngheh zual a ni tih a ni bawk.
Mahse, Kholood Khair of Confluence Advisory, a think-tank on Sudanese affairs chuan Wagner Group te chuan Sudan ram buai mekah tanlam bik an nei lo a ti thung a. “Wagner te hian General al-Burhan enterprise leh Hemedti enterprise te nena inzawmna an nei ve ve,” tiin a sawi.
Africa-a Wagner te chetna dang
Wagner te hian Central African Republic (CAR) ram chhungah kum tam tak an inbun tawh a, CAR a dfiamond mines te chu vengin hei bakah hian Libya leh Mali ah te pawh an inkhuar bawk.
Kum 2021 a BBC investigation neih chuan Wagner te hi Libya civil war ah pawh khan an inhnamhnawih ngei tih a finfiah bawk a. Mali ah phei chuan sorkar in Wagner te chu Islamist militant te an beihnaah pui turin langsar takin a sawm hial thung.
Human Rights Watch (HRW) te chuan Russian mercenary te chu CAR leh Mali nunrawng taka chetlaah an puh bawk.