SAI-ah sports discipline dah belh ngen

Sports & Youth Services minister ni bawk Lalnghinglova Hmar hian Sports Authority of India (SAI) director general Sandip Pradhan pawh a kawm a. Aizawla SAI Training Centre (STC) ah sports discipline tam zawk dah dan tur a sawipui.
India-in kum 2036 Olympic Games thlen a tumah Mizoram atangin infiammi tam thei ang ber tel an duh a. Hemi inbuatsaihna atan STC Aizawlah Mizote thatna leh Olympic Games-a tel beisei theihna tur chi sports discipline dah belh dan tur an sawidun. STC, Aizawlah hian sports discipline pali – boxing, judo, taekwondo leh weightlifting-ah training kalpui mek a ni.
Olympic 2036 Vision denchhenin Mizoram khua zawng zawng hrutchhuak tur sports coaching liantham kalpui tum a ni tih Lalnghinglova Hmar hian a sawi a. SAI director general chuan hei hi a lo phurpui hle a, coaching pekna tur sports discipline thlanchhuah chu uluk taka kalpui a ngai a, coach-te chu a tul anga training pe turin an inhuam tih Sports minister hi a lo hrilh a ni. Hemi chungchanga thawhho dan tur chiang zawka sawidun leh turin an inthlah a ni.