Sainik School-a zirlai thenkhat harsatna sutkian pui turin ngen

Sainik School-a zirlai thenkhat
harsatna sutkian pui turin ngen
Sainik School Chhingchhipa zirlai, unaua lut ten scholarship an dawn kawp theihna’n hma laksak turin Mizo Zirlai Pawl chuan Mizoram sawrkar thuneitute an ngen.
MZP Gen. Hqrs hruaitute chuan Sainik School-a Mizoram zirlaite chungchangah Thawhtanni khan School Education minister Lalchhandama Ralte an hmu a. He School-a lut zirlaite hi chhungkaw khat ami pawh nise, full scholarship an dawn theihna’n dan dinglai ennawna siamrem ngai siamrem turin an ngen.
‘Mizoramin zirna in kan neih hlut ber zing ami, Sainik School Chhingchhipah hian Mizo naupang thiamthei leh thluakthate an lut thin a. Chutih laiin, thiamthei si, unaua lut te an awm a. Chu’ngte chu khawsak awlsam leh neinung an ni vek loa, an innghahna full scholarship hi unaua an dawn theih loh avangin harsatna an tawk mek,’ MZP hian a ti.
Dan dinglaiah chhungkaw pakhat atanga zirlai pakhat bakin scholarship an dawn theih loh avangin, zirlai hmakhaw eng tak pakhat chu zirna chawlhsan turin inlakchhuah a tum mek nia an hriat thu MZP hruaitute hian sawiin, zirlaite hmakhaw ngaiin he dan hi siamrem thuai a nih theihna’n hma an la tih an sawi. MZP-in a hriat theih chinah, state dangah chuan Sainik School-a zirlaite chu chhungkaw khat atangin zirlai pakhat aia tam an awm pawhin scholarship pek vek an ni tih an sawi bawk.
School Education minister chuan a theih chinah hma lakpui a, a lo bawhzui tur thu hrilhin, department khawih theih bakah pawh thuneitu sang zawkah a lo thlen tur thu a lo hrilh.
MZP hian Mizoram Subordinate Services Selection Board (MSSSB) chairman thar C Lalhuliana pawh an kawm a, MSSSB hnuaia hna lakah thiamna inang rau rauah chuan ram leilung fate duhsak turin an ngen.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More