‘Saiyaara’-in vbc 300 pha lo deuh
‘Saiyaara’-in vbc 300 pha lo deuh
Bollywood newcomer Ahaan Panday leh Aneed Padda te channa romantic drama ‘Saiyaara’ chuan an tlangzarh atanga ni 17 chhungin cinema hall ticket hralhna atangin cheng vaibelchhe 299.75 a la lut hman a, Hindi tawng hmanna romantic drama-ah chuan cinema hall ticket hralhna atanga sum la lut tam ber a la ni a, kumina Hindi film sum la lut tam ber a ni rih bawk.
‘Saiyaara’ hi Bollywood a mi thar ve ve channa a ni chungin box office lamah a hlawhtling hle a, a changtute pahnihin fak an hlawh a, a thawnthuin lung a kuai bawk nen, an tlangzarh atanga weekend vawi thumnaah pawh a la chetha thawkhat viau a ni.
Tun weekend kalta khan Bollywood film lian tham deuh tlangzarh thar pahnih, Ajay Devgn leh Mrunal Thakur channa ‘Son of Sardaar 2’ leh Vijay Deverakonda ‘Dhadak 2’ a awm a, hei bakah hian animated movie ngaihven hlawh tak ‘Mahavtar Narsimha’ an tlangzarh bawk a, heti chung hian ‘Saiyaara’ hian weekend (Zirtawpni-Pathianni) khan cheng vaibelchhe 19.25 a la lalut thei tho a ni.