Salman Khan thah tumtu rawlthar kum 16 mi an man

Salman Khan thah tumtu rawlthar kum 16 mi an man
Police ten darkar kua vel operation neia, km 10 vel zet an in um kual zak zak hnuah Thawhlehni zing khan police control room phone a bia a Salman Khah thah a tum thu sawitu chu police ten an man a, police control room betu hi Rajasthan rawlthar kum 16 mi, class IX dropout a lo ni.
Salman Khan hi a film thar ‘Kisi Ka Bhai, Kisi Ki Jaan’ vawrh larin tunlai chu a hmanhlel hle a, he film hi Eid laia tlangzarh tur a ni. Salman hian thaha vauna a hma pawha a lo tawh tawh avangin Mumbai police ten Y+ category venhimna an pe mek a ni.
Thawhtanni zan dar 9:14 velah Mumbai city police control room chuan call an dawng a, a rawn betu chuan April ni 30-ah Salman chu a thah tur thu a sawi a, a duh ang a sawi zawh veleh call a titawp zui ta nghal a ni.
Police control room a awm ten a betu hi a phone number-ah an call let a, a hming leh a nihna te an zawt a, Rocky Bhai a nih thu leh Gau Rakshak (bawng humhalhtu pawl), Jodhour, Rajasthan a cheng a nih thu a sawi ve mai bawk a ni. A hma lawkin Salman Khan hian thawh a vauna email a lo dawng tawh bawk a ni.
Mumbai city crime branch chuan rang takin team pathum an din nghal vat a, Thawhtanni zan dar 11:30-ah chuan crime branch hian mobile phone chu an hrechiang hman viau tawh. A phone chu switch off mah se a location-ah Padgha bul, Shahpur, Thane district tih an hre nghal a. team member pariat awmnain a location hi an pan nghal a, team dang pakhatin technical intelligence lam an lakhawm ve thung a, team thumna chu a tul tula che turin an inpeih reng bawk. Thawhleni zing dar 1:30-ah phone chu a switch on zuai a, a off leh nghal a, zankhuain police ten an veh kual ta a ni.
Thawhlehni zing dar 7:30 velah police ten rawlthar pahnih bike a chuang te chu ringhlelin, um tumin an inpuahchah a, chutih lai tak chuan support team atangin an mobile phone zawn chu switch on a nih thu an dawng a, police te chuan bike hnunga chuang zawk chuan a phone a en tih an hmu nghal a, uniform ha lo-a duty police ten ding tura an tih chuan an tlanchhe ta nghal a ni. Police ten um nghalin, km 10 vel an inum zak zak hnuah an man thei ta a ni.
He rawlthar hian police control room betu a nih tih a inpuang nghal a, tun thla tir maia Rajasthan atanga Mumbai lut niin, a cousin bulah Padgha-ah a khawsa a. He rawlthar hian Salman Khan chu chuti takin a mi hriat pawh a nih loh thu sawi bawk. Police te chuan kumtling lo a nih avangin Juvenile Justice Act inkaihhruaina angin child welfare committee kutah an hlan a, CWC hian he rawlthar hi David Sassoon Industrial School & Children’s Home a dah phawt turin a ti ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More