Chhattisgarh tleirawlin tui hleuh rei record siam

Purai khua Durg district, Chhattisgarh-a tleirawl kum 15 mi Chandrakala chuan chawl lovin darkar 8 chhung tui a hleuh a, Guinness World Record a siam. Chandrakala chuan tuihleuh chu nuam a tih thu leh naupan lai atanga rei tak tak tui a lo hleuh thin chu tuna record a siam theihna chhan pakhat ni a a hriat thu a sawi.
Pawl 10 zirlai Chandrakala hian kum 5 mi a nih lai atangin tuihleuh a thiam tawh niin a sawi a, state leh national level intihsiaknaah te pawh a lo tel fo tawh a, junior open national leh state competition-ah gold patum leh silver medal pahnih a dawng tawh nghe nghe a ni. A unaute pawh tuihleuh thei tak tak niin, a nau Siddarth pawh state player niin, a u Bhumika chu national swimmer a ni bawk.
Chandrakala hi Purai khuaa tuikhuahah zing dar 5:10-ah tui hi hleuh tanin, chawhnu dar 1:10 thleng a hleuh ta ngat ngat a, Guinness World Record a siam ta a ni. Record siam tum hian nitin darkar 10-12 chung te inbuatsaih nan a hmang thin niin a trainer Om Kumar Ojha chuan a sawi a, a khaw pumin an tuipui bawk a, record a siam ngei theih nan a ei leh in bakah a exercise lak leh mut dan thlenga buaipuitu group te an indin hial a ni.