Zirtawp zing khan NBA 2024-25 khelh chhunawm a ni a, Antonio Spurs chuan point 106-88 in Utah Jazz an hneh. Jazz an hneh tum hian Victor Wembanyama chuan 5×5 a pui tlin.
Spurs hian Jazz lakah bul an tan tha lo viau a, quarter hmasa berah point 11 zetin hnufual zawkah an tang. Quarter hmasa berah hnufual zawk ni mah se an insiamtha thuai a, quarter dang pathumah chungnung zawkah an tang ta vek. Quarter hnihnaah point ngain an chungnung a, quarter thumnaah point 16 ngawtin an chungnung zui leh a. Quarter hnuhnung berah pawh point 8 in an chungnung zui leh a. An khingpui Utah Jazz lakah hian point 18 in hnehna an chang zui ta a ni.
Jazz an hneh tum hian Spurs player pawimawh Victor Wembanyama chuan point 25 a thawkchhuak a, ball sawhlet vawi kua a dawng a, assist vawi 7, block vawi nga leh ball chhuhsak vawi nga a nei tling bawk a. Category hrang hrang pangaah 5 puitlin vekin 5×5 a puitlin a, a che tha hle.
Zirtawpni zinga inkhel dangah Memphis Grizzles chuan point 122-99 in Milwaukee Bucks an hneh ve bawk. Bucks an hneh tum hian Ja Morant chuan point 26 a thawkchhuak a, assist vawi 14 a neih bakah ball sawhlet vawi 10 a nei bawk a, NBA-ah a vawi 12 nan triple-double a puitlin. Bucks tan hian Giannis Antetokounmpo chuan point 37 zet thawkchhuak mah se a team a chakpui zo chuang lo thung.
San Antonio Spurs in Jazz an hneh
Get real time updates directly on you device, subscribe now.
Prev Post