Sangauah zirlaiten zirtirtute dang

Govt. Blue Mountain High School Sangau Lai Students’ Association Branch chuan an lo puan lawk tawh angin, June 26 khan zirtirtute school kal tur an dang.
An lo sawi tawh angin, an school headmaster chu thla thum chauh a awm hman tihin hmundanga sawn chhuah a ni a; zirlaite tan, zirtirtute dangte tan leh school tan hmasawnna tam tak a rawn thlen nghal avangin heti zat chauh awma chhuak leh mai tur chuan an ui a. Headmaster hi sawn let leh phutin Thawhtanni zing khan Govt. Blue Mountain High School zirlai 131 chuan an school gate-ah sit in demonstration neiin an zirturtute school kal tur an dang a ni.
Lai Students’ Association Sub Hqrs Sangau chuan Sangau High School zirlaite harsatna tawh chu pawi an tih pui tih sawiin, an hmalakna an thlawp tiin thuchhuah an siam. Govt. Blue Mountain High School-a post ruak Mizo teacher bakah non teaching staff – LDC pakhat leh IVth grade pakhat awlte chu tun thla (June) chhung ngeia hnawhkhah an phut bakah Sangau Govt High School atanga teaching staff post ruak nghal mai tur pahnih chu an aiawh tur sawrkar thuneituten an dah ve nghal an phut tel tih a sawi a ni.
School Education department thuneitute atanga chhanna an hmu lo a nih chuan, vawiin – June 27 hian Sangaua LSA Branch pali awmte nen an thilphut tihhlawhtlinna atan hian hma lak chhunzawm an tum tih an sawi a ni.